এখন ব্যতিক্ৰমী ৰাস: কলিয়াবৰত গোপীৰ চৰিত্ৰত দেখা যাব শ শ যুৱকক

কলিয়াবৰ : সমাগত ৰাসলীলা । ৰাজ্যৰ সত্ৰ, নামঘৰ আদিত চলিছে ৰাসলীলাৰ প্ৰস্তুতি । ব্যতিক্ৰম নহয় সংস্কৃতিৰ বৰঘৰস্বৰূপ নগাঁও জিলাৰ কলিয়াবৰ । তাল-খোলৰ মধুৰ ধ্বনিৰ লগতে "আহা আহা সখীসৱ বৃন্দাবনে যাওঁ" গীতেৰে মুখৰিত হৈছে কলিয়াবৰৰ নামঘৰ । ৰাসলীলাৰ সময়ত কলিয়াবৰত অতীজৰে পৰা পুৰুষে নাৰীৰ চৰিত্ৰ ৰূপায়ণ কৰাৰ এক পৰম্পৰা চলি আছে । সেই পৰম্পৰা অক্ষুণ্ণ ৰাখি এইবাৰো সত্ৰ, নামঘৰ বা ৰাজহুৱা নামঘৰত ভাওনাত নাৰী চৰিত্ৰ পুৰুষসকলে ৰূপায়ণ কৰিবলৈ সাজু হৈছে ।

কলিয়াবৰৰ সমাজ-সাংস্কৃতিক জীৱনৰ এক ঐতিহ্য হাজাৰ ব্যৱস্থাৰ অন্যতম উত্তৰ কলিয়াবৰ হাজাৰে সেই পৰম্পৰাৰে শ্ৰীকৃষ্ণৰ ৰাস মহোৎসৱ আয়োজন কৰিছে । য'ত সকলো চৰিত্ৰ ৰূপায়ণ কৰিব যুৱকসকলে । ইতিমধ্যে উত্তৰ কলিয়াবৰ হাজাৰৰ নামঘৰত আখৰা চলি আছে । অহা ১৫ নৱেম্বৰত পৱিত্ৰ ৰাস পূৰ্ণিমাৰ নিশাই শ্ৰীমন্ত শঙ্কৰদেৱ বিৰচিত 'কেলি-গোপাল' নাট প্ৰদৰ্শন কৰা হ'ব । এই ৰাসত কলিয়াবৰৰ বিভিন্ন স্থানৰ ৩ শতাধিক যুৱকে গোপীৰ চৰিত্ৰ ৰূপায়ণ কৰিব বুলি আয়োজক সমিতিয়ে জনাইছে ।

লগতে পঢ়ক :এজোপা গছৰ জন্মদিন পাতিলে ৰাইজে...দিলে এক বিশেষ বাৰ্তা