বোকাখাতত ডাম্পাৰৰ খুন্দাত নিহত শিক্ষক

গোলাঘাট: ৰাজ্যৰ অন্যান্য প্ৰান্তৰ সমান্তৰালভাৱে গোলাঘাট জিলাত দিনক দিনে বৃদ্ধি পাইছে ডাম্পাৰৰ দৌৰাত্ম্য । দৈনিক জিলাখনৰ বিভিন্ন প্ৰান্তত তীব্ৰবেগী ডাম্পাৰৰ দৌৰাত্ম্যৰ ফলত সংঘটিত হৈ আহিছে সৰু-ডাঙৰ পথ দুৰ্ঘটনা । এইবাৰ ঘটনাৰ স্থান বোকাখাতৰ ৩৭ নং ৰাষ্ট্ৰীয় ঘাইপথ । বোকাখাতৰ ৩৭ নং ৰাষ্ট্ৰীয় ঘাইপথেৰে নিজৰ AS-05-Q-7024 নম্বৰৰ মটৰচাইকেলেৰে বিদ্যালয় অভিমুখে গৈ থকা অৱস্থাত অভিজিত চাৰ' নামৰ শিক্ষকজনৰ বাইকত প্ৰচণ্ড খুন্দা মৰে ডাম্পাৰে, যাৰ পৰিপ্ৰেক্ষিতত বহু দূৰৈত ছিটিকি পৰে অভিজিত চাৰ' নামৰ শিক্ষকজন । উক্ত দুৰ্ঘটনাৰ ফলত থিতাতে মৃত্যু হয় শিক্ষকগৰাকীৰ ।  

বোকাখাত বহিখোৱাৰ মহিদুল চাৰ'ৰ পুত্ৰ আছিল অভিজিত চাৰ' । ঘটনা সংঘটিত কৰি ঘটনাস্থলীৰ পলায়ন কৰে ডাম্পাৰখনে । ঘটনাস্থলীত বোকাখাত আৰক্ষী থানাৰ এটা আৰক্ষীৰ দল উপস্থিত হৈ মৃতদেহ উদ্ধাৰ কৰি মৰোণোত্তৰ পৰীক্ষাৰ বাবে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰাৰ লগতে ডাম্পাৰখন বিচাৰি অভিযান আৰম্ভ কৰিছে ।

লগতে পঢ়ক: বিশ্বনাথৰ সাধাৰুত মন্ত্ৰী-বিধায়কৰ তীব্ৰবেগী কনভয়ৰ খুন্দাত নিহত এজন: পৰিস্থিতি উত্তপ্ত