নুমলীগড়ৰ তেলগৰমত ছাত্ৰীক ধৰ্ষণ কৰি হত্যাৰ সন্দেহ আত্মীয়ৰ

গোলাঘাট, 17 ফেব্ৰুৱাৰী : নুমলীগড়ৰ তেলগৰমৰ পংকাগ্ৰান্টত অঘটন ৷ শনিবাৰে এগৰাকী অষ্টম শ্ৰেণীত অধ্যয়নৰত ছাত্ৰীৰ মৃত্যুক কেন্দ্ৰ কৰি অঞ্চলটোত সৃষ্টি হৈছে তীব্ৰ চাঞ্চল্যৰ ৷ পৰিয়ালৰ কোনো লোক ঘৰত নথকাৰ সুযোগ লৈ কোনো দুৰ্বৃত্তই অপকৰ্ম কৰি কোঠাৰ ভিতৰতে আত্মহত্যাৰ ৰূপ দিয়ে ছাত্ৰীগৰাকীক ৷ এই অভিযোগ ছাত্ৰীগৰাকীৰ আত্মীয়ৰ ৷

পৰিয়ালৰ লোকে উল্লেখ কৰা অনুসৰি, শনিবাৰে দুপৰীয়াৰ ভাগত ছাত্ৰীগৰাকী ঘৰতে অকলশৰে আছিল ৷ তাৰে সুযোগ গ্ৰহণ কৰি দুৰ্বৃত্তই এই নাৰকীয়কাণ্ড সংঘটিত কৰাৰ সন্দেহ কৰিছে পৰিয়ালৰ লোকে ৷ ইফালে ঘটনাৰ খবৰ লাভ কৰিয়েই নুমলীগড় আৰক্ষী আৰু কাৰ্যবাহী দণ্ডাধীশ ঘটনাস্থলীত উপস্থিত হৈ ছাত্ৰীগৰাকীৰ মৃতদেহ উদ্ধাৰ কৰে ৷

তাৰ পাচত মৰণোত্তৰ পৰীক্ষাৰ বাবে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰা হয় ছাত্ৰীগৰাকীৰ মৃতদেহ ৷ লগতে ঘটনা সন্দৰ্ভত তদন্ত আৰম্ভ কৰিছে আৰক্ষীয়ে ৷ ইফালে এই ঘটনাৰ উচিত তদন্ত কৰি দোষীক কৰায়ত্ত শাস্তি বিহিবলৈ দাবী জনাইছে মৰঙি আঞ্চলিক ছাত্ৰ সন্থাই ৷

লগতে পঢ়ক : প্ৰেম প্ৰত্যাখ্যান কৰাৰ বাবে কলিয়াবৰত প্ৰেমিকাক ছুৰীকাঘাত !