গুৱাহাটীত জব্দ লক্ষাধিক মূল্যৰ বিদেশী চিগাৰেট - Foreign cigarette seized

গুৱাহাটী, 28 মে’: ৰাজ্যত এতিয়াও অব্যাহত আছে নিচাযুক্ত দ্ৰব্যৰ বিৰুদ্ধে আৰক্ষীৰ অভিযান । মঙলবাৰে মহানগৰীৰ গড়চুকৰ পামহীত আৰক্ষীয়ে অভিযান চলাই জব্দ কৰে বৃহৎ পৰিমাণৰ বিদেশী চিগাৰেট । গড়চুক আৰক্ষীয়ে গোপন সূত্ৰৰ ভিত্তিত অভিযান চলাই জব্দ কৰা বিদেশী চিগাৰেটখিনিৰ মূল্য প্ৰায় 50 লক্ষাধিক টকা হ’ব বুলি জানিব পৰা গৈছে । 

জানিব পৰা মতে শিলচৰৰ পৰা গুৱাহাটীলৈ AS 01 LC 0213 নম্বৰৰ ট্ৰাক এখনেৰে সৰবৰাহ কৰা হৈছিল বিদেশী চিগাৰেটখিনি । সৰবৰাহ কৰি আজিৰ দিনটোৰ বাবে পামহীৰ এটা ভগা-চিগা লোহা ৰখা গুদামত ৰাখি থোৱা হৈছিল বিদেশী চিগাৰেটভৰ্তি ট্ৰাকখন । গোপন সূত্ৰৰ পৰা তথ্য লাভ কৰি গড়চুক আৰক্ষীৰ ভাৰপ্ৰাপ্ত বিষয়াৰ নেতৃত্বত অভিযান চলাই জব্দ কৰা হয় চিগাৰেটখিনি ৷ 

গুদামটো পামহীৰ চেলিম মোল্লা নামৰ লোকজনৰ বুলি জানিব পৰা গৈছে ৷ গুদামৰ স্বত্বাধিকাৰীৰ লগতে আন পাঁচ অভিযুক্তকো আটক কৰে গড়চুক আৰক্ষীয়ে । অধিক তথ্যৰ বাবে জেৰা অব্যাহত ৰাখিছে গড়চুক আৰক্ষীয়ে ।

লগতে পঢ়ক: কৰিমগঞ্জত ১০০ কোটি টকাৰ ড্ৰাগছ জব্দ