সতীৰ্থ ছাত্ৰই কেঁচীৰে হানি-খুচি আহত কৰিলে সহপাঠীক

নলবাৰী: কিছুদিন পূৰ্বে দৰঙৰ এগৰাকী ছাত্ৰই সহপাঠীক হত্যা কৰাৰ ঘটনা কোনেও পাহৰা নাই ৷ এইবাৰ নলবাৰীত ঘটিল আন এক ঘটনা । এজন ছাত্ৰই কেঁ‌চীৰে হানি-খুচি আঘাতপ্ৰাপ্ত কৰিলে আন এগৰাকী ছাত্ৰক । সম্প্ৰতি চিকিৎসালয়ত ভৰ্তি হৈ আছে গুৰুতৰভাৱে আঘাতপ্ৰাপ্ত ছাত্ৰজন । নলবাৰীৰ মহিনা হাইস্কুলত সংঘটিত হৈছে এই ভয়ংকৰ ঘটনাটো ।

হাইস্কুলখনৰ দশম শ্ৰেণীত অধ্যয়নৰত এজন ছাত্ৰক কেঁ‌চীৰে হানি-খুচি আহত কৰিলে একে শ্ৰেণীৰে আন এজন ছাত্ৰই । যাক লৈ আজি নলবাৰী জিলাখনতেই এক চাঞ্চল্যৰ সৃষ্টি হয় । শ্ৰেণীকোঠাত শিক্ষকৰ পাঠদান শেষ হোৱাৰ পিছতেই ঘটনাটো সংঘটিত হয় বুলি জনাই আহত ছাত্ৰজনৰ আত্মীয়ই । আন এজন ছাত্ৰই নিজৰ বেগত লৈ অহা কেঁ‌চীৰে এই ছাত্ৰজনক শ্ৰেণীকোঠাৰ বাহিৰত হানি-খুচি আঘাতপ্ৰাপ্ত কৰে । তাৰ পিছতেই আঘাতপ্ৰাপ্ত ছাত্ৰজনক বিদ্যালয়খনৰ শিক্ষকসকলে ধমধমাত প্ৰাথমিক চিকিৎসা প্ৰদান কৰি দায় সৰাৰ অভিযোগ উত্থাপন কৰে আহত ছাত্ৰৰ পৰিয়ালে ।

পৰৱৰ্তী সময়ত পৰিয়ালৰ লোকে ছাত্ৰজনক নলবাৰীৰ এখন ব্যক্তিগত খণ্ডৰ হাস্পতালত ভৰ্তি কৰোৱায় । কিন্তু ডাঙৰ প্ৰশ্নটো হ'ল- পঢ়িবলৈ আহোতে বিদ্যালয়লৈ চোকা কেঁচী লৈ আহিবলৈ এজন ছাত্ৰই সুযোগ-সুবিধা পালে কেনেকৈ ? মূলতঃ বিদ্যালয় কৰ্তৃপক্ষৰ গুৰুত্বহীনতাই ইয়াৰ মূল কাৰণ বুলি অভিযোগ উত্থাপিত হৈছে অঞ্চলজুৰি । 

লগতে পঢ়ক: শ্ৰেণীকোঠাত পাঠদানৰ সময়তে ছাত্ৰৰ ছুৰিকাঘাতত নিহত শিক্ষক - Teacher stabbed to death