মানাহত মৃত্যু ঘোঙৰ : মৰণোত্তৰ পৰীক্ষাৰ অন্তত বাঁহবাৰী ৰেঞ্জত সৎকাৰ - Black Panther

বাক্সা, ২৬ জুলাই : মানাহ ৰাষ্ট্ৰীয় উদ্যানত বৃহস্পতিবাৰে বিয়লি ভাগত বন বিভাগে উদ্ধাৰ কৰে এটা ঘোঙৰ মৃতদেহ ৷ তাৰ পাচত শুকুৰবাৰে পুৱা মানাহৰ বাঁহবাৰী ৰেঞ্জত বন বিষয়াৰ উপস্থিতিত বন বিভাগৰ পশু চিকিৎসকৰ দলে ঘোঙৰ মৃতদেহটোৰ মৰণোত্তৰ পৰীক্ষা সম্পন্ন কৰে ৷

মৰণোত্তৰ পৰীক্ষাৰ অন্তত পশু চিকিৎসকৰ দলে ঘোংটোৰ শৰীৰত থকা আঘাতৰ বাবেই মৃত্যু হোৱা বুলি উল্লেখ কৰে ৷ পশু চিকিৎসকে উল্লেখ কৰে যে বন্যপ্ৰাণীৰ আবাসিক এলেকাৰ বাবে পৰস্পৰৰ মাজত হোৱা কাজিয়াৰ ফলতে সম্ভৱতঃ ঘোংটো আঘাতপ্ৰাপ্ত হৈছিল ৷ সেই আঘাতৰ বাবে হোৱা সংক্ৰমনজনিত ৰোগৰ বাবেই ঘোংটোৰ মৃত্যু হয় ৷

লগতে প্ৰায় তিনি বছৰীয়া মতা মৃত ঘোংটোৰ ডিঙিত আন প্ৰাণীয়ে কামোৰাৰ চিন স্পষ্ট হৈ আছিল বুলিও উল্লেখ কৰে পশু চিকিৎসকৰ দলে উল্লেখ কৰে ৷ মৰণোত্তৰ পৰীক্ষাৰ অন্তত ঘোংটোৰ দেহৰ বিভিন্ন অংগৰ নমুনা সংগ্ৰহ কৰা হয় ৷ তাৰ পাচত বিভাগীয় নীতি অনুসৰি মৃত বন্যজীৱটোৰ সৎকাৰ কৰা হয় ৷

লগতে পঢ়ক : কাজিৰঙাত মাকৰ পৰা বিচ্ছিন্ন হোৱা গঁড়ৰ পোৱালি উদ্ধাৰ - Assam Flood 2024