কংগ্ৰেছে কৰ্মফল ভূগিছে, দলত্যাগৰ তালিকা দীঘলীয়া হ’ব : সুৰেশ বৰা

নগাঁও, 2 মাৰ্চ : শনিবাৰে দিল্লীৰ পৰা ভাৰতীয় জনতা পাৰ্টীয়ে ঘোষণা কৰিছে অন্যান্য ৰাজ্যৰ লগতে অসমৰো লোকসভা নিৰ্বাচনৰ প্ৰাৰ্থী তালিকা । ৰাজ্যৰ বহুচৰ্চিত নগাঁও লোকসভা সমষ্টিৰ প্ৰাৰ্থীৰ নামো ঘোষণা কৰিছে বিজেপিয়ে । মাত্ৰ কেইদিনমান পূৰ্বে কংগ্ৰেছ দল ত্যাগ কৰি বিজেপিত যোগদান কৰিয়েই লোকসভা সমষ্টিৰ প্ৰাৰ্থিত্ব লাভ কৰিবলৈ সক্ষম হৈছে প্ৰাক্তন কংগ্ৰেছী তথা ন-বিজেপি নেতা সুৰেশ বৰাই । বিজেপিৰ প্ৰাৰ্থিত্ব লাভ কৰিয়েই কংগ্ৰেছৰ বিৰুদ্ধে আক্ৰমনাত্মক ৰূপত সুৰেশ বৰা ।

শনিবাৰে বিয়লি প্ৰাৰ্থী ঘোষণা কৰাৰ পিচতেই নগাঁও জিলা বিজেপি কাৰ্যালয়ত বিৰাজ কৰিছে এক উৎসৱমুখৰ পৰিৱেশ । সন্ধিয়া নগাঁও লোকসভা সমষ্টিৰ প্ৰাৰ্থী সুৰেশ বৰাক উষ্ম আদৰণি জনায় দলীয় নেতা কৰ্মীয়ে । বিজেপি দলৰ প্ৰাৰ্থিত্ব লাভ কৰিয়েই কংগ্ৰেছৰ বিৰুদ্ধে আক্ৰমনাত্মক হৈ পৰে সুৰেশ বৰা । কংগ্ৰেছে এতিয়া কৰ্মফল ভূগিছে বুলি উল্লেখ কৰি সুৰেশ বৰাৰ মন্তব্য । কাইলৈৰ পৰা আৰু অধিক দীঘলীয়া হৈ থাকিব কংগ্ৰেছৰ দলত্যাগৰ তালিকা । নগাঁও লোকসভা সমষ্টিৰ বহু সংখ্যালঘূ ৰাইজেও এইবাৰ বিজেপিক সমৰ্থন দিব বুলি দাবী কৰিলে সুৰেশ বৰাই ।

লগতে পঢ়ক : বিজেপিৰ প্ৰথমখন প্ৰাৰ্থী তালিকা : অসমৰ ১১গৰাকী প্ৰাৰ্থীৰ নাম ঘোষণা