চুৰাইবাৰীত বৃহৎ পৰিমাণৰ নিষিদ্ধ কাহৰ চিৰাপ জব্দ

কৰিমগঞ্জ, 12 ফেব্ৰুৱাৰী : চুৰাইবাৰীত আৰক্ষীৰ অভিযানত বৃহৎ পৰিমাণৰ নিষিদ্ধ কাহৰ চিৰাপ জব্দ৷ এখন ট্ৰাকৰ পৰা আৰক্ষীয়ে জব্দ কৰে বিপুল পৰিমাণৰ নিচাজাতীয় কাহৰ চিৰাপখিনি ৷ নিষিদ্ধ সামগ্ৰীখিনিৰ লগতে মেঘালয়ৰ 2 টা সৰবৰাহকাৰীকো আটক কৰে আৰক্ষীয়ে ৷

অসমৰ পৰা ত্ৰিপুৰালৈ চোৰাংকৈ সৰবৰাহ কৰাৰ পথত নিচাযুক্ত কাহৰ চিৰাপ সমূহ জব্দ কৰে আৰক্ষীয়ে ৷ চুৰাইবাৰী আৰক্ষী থানাৰ ভাৰপ্ৰাপ্ত বিষয়া প্ৰণৱ মিলিয়ে জনোৱা মতে, সোমবাৰে পুৱা এ এছ 01 আৰ চি 1881 নম্বৰৰ বিভিন্ন সামগ্ৰী ভৰ্তি এখন ট্ৰাক আৰক্ষী আউটপোষ্টৰ সন্মুখত থকা চেকিং পইণ্টত উপস্থিত হোৱাৰ সময়ত কৰ্তব্যৰত আৰক্ষীয়ে সচৰাচৰৰ দৰেই নিয়মীয়া তালাচী চলায় ৷ এই তালাচীত ট্ৰাকখন থকা অন্যান্য সামগ্ৰীৰ আঁৰত লুকুৱাই ৰখা 10 টা কাৰ্টনত মুঠ 1600 বটল নিষিদ্ধ কাহৰ চিৰাপ জব্দ কৰে আৰক্ষীয়ে ৷  

জব্দ কৰা নিষিদ্ধ সামগ্ৰীখিনিৰ বজাৰ মূল্য কেইবা লাখ টকা বুলি জানিব পৰা গৈছে ৷ ইফালে আটকাধীন সৰবৰাহকাৰী কেইটা মেঘালয়ৰ বাৰৱেল লিংডোহ আৰু শিবৰলাং তালাং বুলি আৰক্ষীয়ে জানিবলৈ দিয়ে ৷ ইতিমধ্যে আৰক্ষীয়ে অভিযুক্তৰ বিৰুদ্ধে গোচৰ ৰুজু কৰি তদন্ত আৰম্ভ কৰিছে ৷

লগতে পঢ়ক : ভূমি বিবাদক কেন্দ্ৰ কৰি কাছাৰত মহিলাসহ আহত 5