ইণ্টাৰনেশ্যনেল ডেস্ক,১৪ ছেপ্টেম্বৰ : বিগত জুন মাহৰ পৰা মহাকাশতে আৱদ্ধ হৈ আছে দুই মহাকাশচাৰী ক্ৰমে সুনীতা উইলিয়ামছ আৰু বাচ্চ উইলম'ৰ । শেহতীয়াকৈ তেওঁলোকক পৃথিৱীলৈ ঘূৰাই অনাৰ অন্যতম উপায় হিচাপে মহাকাশত আৱদ্ধ হৈ থকা ব'য়িং ষ্টাৰলাইনাৰ কেপচুলটো উভতি আহে । কিন্তু মহাকাশতে আৱদ্ধ হৈ থাকিল দুয়োগৰাকী মহাকাশচাৰী ।
ব'য়িং ষ্টাৰলাইনাৰ কেপচুলটো পৃথিৱীলৈ ঘূৰি অহাৰ পিছত প্ৰথমবাৰৰ বাবে দুয়োগৰাকী মহাকাশচাৰীয়ে প্ৰতিক্ৰিয়া প্ৰকাশ কৰিছে । ব'য়িং যাত্ৰাৰ সমস্যাৰ বিষয়ে উল্লেখ কৰাৰ উপৰিও কেইবামাহ অতিবাহিত কৰাৰ সম্ভাৱনাৰ সৈতে মোকাবিলা কৰাটো কঠিন বুলিও দুয়োগৰাকী মহাকাশচাৰীয়ে স্বীকাৰ কৰে ।
বিগত সপ্তাহত ব'য়িং ষ্টাৰলাইনাৰ কেপচুলটো ঘূৰি অহাৰ পিছত তেওঁলোকে প্ৰথমবাৰৰ বাবে বিশবাসীক সম্বোধন কৰিছে । ব'য়িং ষ্টাৰলাইনাৰ কেপচুলৰ বিজুতিৰ বাবে তেওঁলোকৰ উভতনি যাত্ৰা দীঘলীয়া হোৱাৰ আশংকা কৰা হৈছে । ৮ দিনীয়া অভিযান এতিয়া ৮ মাহতকৈও অধিক সময়জুৰি চলিব বুলি আশা কৰা হৈছে ।
বাচ্চ উইলম'ৰৰ প্ৰতিক্ৰিয়া
সমগ্ৰ পৰিস্থিতি সন্দৰ্ভত বাচ্চ উইলম'ৰে কয়,"সময়ৰ লগে লগে চেষ্টা অব্যাহত আছিল । গোটেই যাত্ৰাটোত কিছু কঠিন সময় আছিল । মহাকাশযানৰ পাইলট হিচাপে আপুনি ইয়াক আপোনাৰ অবিহনে বন্ধ হোৱাটো চাব নিবিচাৰে, কিন্তু ইয়াতে এনেকুৱাই হয় ।"
উইলম'ৰে হতাশা ব্যক্ত কৰি কয় যে তেওঁ কনিষ্ঠ কন্যাৰ হাইস্কুলৰ অন্তিম বৰ্ষৰ বাবে ওচৰত থাকিব নোৱাৰিব । ইফালে আগন্তুক নিৰ্বাচনত মহাকাশৰ পৰাই যাতে তেওঁলোকে ভোটদান কৰিব পাৰে তাৰ ব্যৱস্থা কৰিবলৈও আহ্বান জনায় । মহাকাশ অভিযানৰ সমান্তৰালকৈ নাগৰিকৰ কৰ্তব্যও পালন কৰিব বিচাৰে দুয়োগৰাকী মহাকাশচাৰীয়ে ।
উইলম'ৰ আৰু উইলিয়ামছ এতিয়া স্থায়ী ষ্টেচন ক্ৰু সদস্য যি নিয়মীয়া তত্বাৱধানৰ ওপৰত নিৰ্ভৰ কৰে । ইফালে উইলিয়ামছে কেইসপ্তাহমানৰ ভিতৰতে মহাকাশ কেন্দ্ৰৰ কমাণ্ড গ্ৰহণ কৰিব । উইলম'ৰে এক সংবাদমেলত এই কথা উল্লেখ কৰে ।
মহাকাশত আৱদ্ধ সুনীতা উইলিয়ামছৰ মন্তব্য
সুনীতা উইলিয়ামছে কয়,"ষ্টাৰলাইনাৰৰ প্ৰথম পৰীক্ষা পাইলট হিচাপে যদিও আমি কেতিয়াও ইয়াত প্ৰায় এবছৰ থাকিম বুলি আশা কৰা নাছিলো, আমি জানিছিলো যে এনে সমস্যা থাকিব পাৰে যি তেওঁলোকৰ উভতি অহাত পলম কৰিব পাৰে । এইটো পেচাত কামবোৰ এনেকুৱাই হয় ।"
দুয়োগৰাকীয়ে বিমানখনত থকা আন ৭ গৰাকী মহাকাশচাৰীৰ সৈতে এই সপ্তাহৰ আৰম্ভণিতে দুজন ৰাছিয়ান আৰু এজন আমেৰিকানক লৈ যোৱা চয়ুজ মহাকাশযানক আদৰণি জনাইছিল । যাৰ ফলত ষ্টেচনৰ জনসংখ্যা অস্থায়ীভাৱে ১২ লৈ বৃদ্ধি পাইছিল । এই মাহৰ শেষৰ ফালে স্পেচএক্সত আৰু দুজন মহাকাশচাৰী উৰা মাৰিব; উভতি অহাৰ সুবিধাৰ্থে উইলম'ৰ আৰু উইলিয়ামছৰ বাবে কেপচুলৰ দুখন আসন খালী ৰখা হ'ব ।
উইলিয়ামছে মহাকাশ জীৱনৰ অভিজ্ঞতা বৰ্ণনা কৰি কয়,"এয়া মোৰ পছন্দৰ ঠাই । মই মহাকাশত থাকি ভাল পাও । মই মাৰ সৈতে পাৰ কৰা সময় হেৰুওৱাৰ কথা ভাবি কিছু চিন্তিত হৈছিলো ।" উইলিয়ামছৰ মতে তেওঁ একেটা অভিযানতে দুখন বেলেগ বেলেগ মহাকাশযান উৰুৱাবলৈ উৎসাহিত । তেওঁ কয়,"আমি পৰীক্ষক, সেয়াই আমাৰ কাম ।"
পৃথিৱীলৈ ঘূৰি অহাৰ বাবে অচিনাকী লোকসকলেও যিধৰণে প্ৰাৰ্থনা কৰিছে তাক তেওঁলোকে প্ৰশংসা কৰে ।
লগতে পঢ়ক :মহাকাশ ভ্ৰমণ : মহাকাশচাৰীৰ স্বাস্থ্যত কেনে প্ৰভাৱ পৰে ? - Astronauts immune systems
