হায়দৰাবাদ: OpenAI এ ChatGPT চালিত চাৰ্চ ইঞ্জিন মুকলি কৰিছে যিয়ে কৃত্ৰিম বুদ্ধিমত্তা কোম্পানীটোক গুগলৰ সৈতে প্ৰত্যক্ষ প্ৰতিযোগিতাত অৱতীৰ্ণ কৰিব পাৰে বুলি চৰ্চা চলিছে ৷ ইয়ে বাতৰি, ক্ৰীড়াৰ স্ক’ৰ আৰু অন্যান্য সময়োপযোগী তথ্য বিচাৰি ইণ্টাৰনেট ট্ৰেফিক প্ৰবাহত প্ৰভাৱ পেলাব পাৰে ।
ছান ফ্ৰান্সিস্কোস্থিত OpenAI য়ে বৃহস্পতিবাৰে কয় যে তেওঁলোকে ChatGPT ৰ পেইড ব্যৱহাৰকাৰীসকলক এটা সন্ধান বৈশিষ্ট্য মুকলি কৰিছে যদিও অৱশেষত ইয়াক সকলো ChatGPT ব্যৱহাৰকাৰীলৈ সম্প্ৰসাৰিত কৰা হ’ব । কোম্পানীটোৱে জুলাই মাহত ব্যৱহাৰকাৰী আৰু প্ৰকাশকৰ সৰু গোট এটাৰ বাবে প্ৰিভিউ সংস্কৰণ মুকলি কৰিছিল ।
2022 চনত মুক্তি পোৱা ChatGPT ৰ মূল সংস্কৰণটো অনলাইন টেক্সটৰ এক বিশাল ভঁৰালৰ ওপৰত প্ৰশিক্ষণ দিয়া হৈছিল যদিও ইয়াৰ প্ৰশিক্ষণৰ তথ্যত নথকা শেহতীয়া পৰিঘটনাৰ বিষয়ে প্ৰশ্নৰ উত্তৰ দিব পৰা নাছিল । মে’ মাহত গুগলে নিজৰ চাৰ্চ ইঞ্জিন আপডেট কৰিছিল আৰু এতিয়া এআইৰ দ্বাৰা সৃষ্টি কৰা লিখিত সাৰাংশ প্ৰায়ে চাৰ্চ ফলাফলৰ শীৰ্ষত দেখা যায় ।
সাৰাংশৰ উদ্দেশ্য হৈছে ব্যৱহাৰকাৰীয়ে সন্ধান কৰা প্ৰশ্নৰ তৎক্ষণাত উত্তৰ দিয়া, যাতে তেওঁলোকে কোনো লিংকত ক্লিক কৰি অধিক তথ্যৰ বাবে আন এটা ৱেবছাইট চাব নালাগে ।
পেছাদাৰী সাংবাদিকসকলে সংগ্ৰহ কৰা বাতৰি তেওঁলোকৰ চেটবটৰ দ্বাৰা প্ৰদান কৰিবলৈ এআই কোম্পানীসমূহে কৰা প্ৰচেষ্টাই একাংশ সংবাদ মাধ্যম সংস্থাক আতংকিত কৰি তুলিছে । কপিৰাইট উলংঘাৰ বাবে OpenAI আৰু ইয়াৰ ব্যৱসায়িক অংশীদাৰ মাইক্ৰ’ছফ্টৰ বিৰুদ্ধে গোচৰ ৰুজু কৰিছিল কেইবাটাও সংবাদ মাধ্যমে ৷ ইয়াৰ ভিতৰত অন্যতম নিউয়ৰ্ক টাইমছ ।
ৱাল ষ্ট্ৰীট জাৰ্নেল আৰু নিউয়ৰ্ক পোষ্টৰ প্ৰকাশক নিউজ কৰ্পে অক্টোবৰৰ আৰম্ভণিতে আন এটা এআই চাৰ্চ ইঞ্জিন পাৰ্প্লেক্সিটিৰ বিৰুদ্ধে গোচৰ তৰিছিল । বৃহস্পতিবাৰে OpenAI এ এটা ব্লগ পোষ্টত কয় যে তেওঁলোকৰ নতুন চাৰ্চ ইঞ্জিনটো এছ’চিয়েটেড প্ৰেছ আৰু নিউজ কৰ্পকে ধৰি নিউজ পাৰ্টনাৰৰ সহায়ত নিৰ্মাণ কৰা হৈছে ।
কোম্পানীটোৱে কয় যে ইয়াৰ ভিতৰত বাতৰি আৰু ব্লগ পোষ্টৰ দৰে উৎসৰ লিংক অন্তৰ্ভুক্ত কৰা হ’ব । চেটবটে উপস্থাপন কৰা তথ্যৰ মূল উৎসৰ সৈতে লিংকসমূহ মিল খাব নে নহয় সেয়া স্পষ্ট হোৱা নাই ।
