হায়দৰাবাদ: যোগাযোগ খণ্ডত পিছপৰা বুলি বিবেচিত চৰকাৰী টেলিকম কোম্পানী ভাৰত সঞ্চাৰ নিগম লিমিটেড (বি এছ এন এল) এ এতিয়া দ্ৰুতগতিত নিজকে উন্নীত কৰিবলৈ যত্ন কৰিছে । কোম্পানীটোৱে 4G আৰু 5G নেটৱৰ্ক উন্নীতকৰণ সন্দৰ্ভত কাম কৰি আছে ৷ অহা বছৰৰ আৰম্ভণিতে এই নেটৱৰ্কক মুকলি কৰাৰ প্ৰস্তুতি চলাই থকাৰ সময়তে এতিয়া বিএছএনএলে দেশৰ নিৰ্বাচিত অঞ্চলত প্ৰথমটো ফাইবাৰ ভিত্তিক ইণ্ট্ৰানেট টিভি সেৱা মুকলি কৰাৰ কথা ঘোষণা কৰিছে ।
কোম্পানীটোৱে IFTV নামেৰে এই সেৱা আৰম্ভ কৰিছে । উল্লেখ্য যে যোৱা মাহত BSNLৰ নতুন ল'গ' আৰু আন ছটা নতুন সেৱা উন্মোচনৰ লগে লগে ইয়াক প্ৰথম প্ৰৱৰ্তন কৰা হৈছিল । ইয়াত বিএছএনএলৰ ফাইবাৰ-টু-দ্য-হোম (এফটিটিএইচ) নেটৱৰ্ক ব্যৱহাৰ কৰা ব্যৱহাৰকাৰীসকলক লাইভ টিভি সেৱা আৰু পে টিভিৰ সুবিধা প্ৰদান কৰা হয় ।
উল্লেখযোগ্য যে, এই সুবিধা এনে এক সময়ত আৰম্ভ কৰা হৈছে যেতিয়া বিএছএনএলে ৰাষ্ট্ৰীয় ৱাই-ফাই ৰোমিং সেৱাও আৰম্ভ কৰিছে, যিয়ে কোম্পানীটোৰ গ্ৰাহকসকলক সমগ্ৰ দেশৰ বিএছএনএল হটস্পটত দ্ৰুতবেগী ইণ্টাৰনেট ব্যৱহাৰ কৰিবলৈ অনুমতি দিয়ে, যাৰ ফলত গ্ৰাহকৰ ডাটাৰ খৰচ হ্ৰাস পায় ।
বি এছ এন এল আই এফ টি ভি সেৱা
ছ’চিয়েল মিডিয়া প্লেটফৰ্ম X ত এটা পোষ্টত বিএছএনএলে জনাইছে যে তেওঁলোকৰ নতুন আইএফটিভি সেৱাই মধ্যপ্ৰদেশ আৰু তামিলনাডুৰ গ্ৰাহকসকলক উচ্চ ষ্ট্ৰীমিং মানৰ 500 ৰো অধিক লাইভ টিভি চেনেল উপভোগ কৰিবলৈ সক্ষম কৰিব । ইয়াৰ উপৰিও ইয়াত পে টিভি কন্টেন্টো প্ৰদান কৰা হ’ব । ৰিলায়েন্স জিঅ’ আৰু ভাৰতী এয়াৰটেলে আগবঢ়োৱা আন লাইভ টিভি সেৱাৰ দৰে নহয় ৷ কাৰণ এইবোৰত ষ্ট্ৰীমিংৰ দ্বাৰা ব্যৱহৃত ডাটা মাহিলী পেকৰ পৰা কৰ্তন কৰা হয়, বিএছএনএল আইএফটিভিৰ ক্ষেত্ৰত এনে নহ’ব ।
বিএছএনএলে কয় যে টিভি ষ্ট্ৰীমিংৰ বাবে ব্যৱহাৰ কৰা ডাটা তেওঁলোকৰ ডাটা পেকৰ পৰা কৰ্তন কৰা নহ’ব । বিশেষ কথাটো হ’ল টিভি ষ্ট্ৰীমিংৰ বাবে বিএছএনএলে সীমাহীন ডাটা প্ৰদান কৰিব । এই লাইভ টিভি সেৱা কেৱল বিএছএনএল এফটিটিএইচৰ গ্ৰাহকৰ বাবে বিনামূলীয়াকৈ উপলব্ধ কৰা হৈছে ।
বিএনএছএলে নিশ্চিত কৰিছে যে তেওঁলোকে জনপ্ৰিয় অ’টিটি প্লেটফৰ্ম আৰু এমাজন প্ৰাইম ভিডিঅ’, ডিজনী+ হটষ্টাৰ, নেটফ্লিক্স, ইউটিউব আৰু জেই5 ৰ দৰে ষ্ট্ৰীমিং এপৰ ক্ষেত্ৰতো প্ৰযোজ্য কৰিব । ইয়াৰ উপৰিও কোম্পানীয়ে ইয়াৰ সৈতে গেমৰ প্ৰচলনও কৰিব । অৱশ্যে বিএছএনএলে কয় যে তেওঁলোকৰ আইএফটিভি সেৱা বৰ্তমান কেৱল এণ্ড্ৰইড টিভিৰ সৈতেহে কাম কৰিব ।
বিএছএনএলৰ IFTV সেৱাত চাবস্ক্ৰাইব কৰিবলৈ গ্ৰাহকে প্লে ষ্ট’ৰৰ পৰা বিএছএনএল ছেল্ফকেয়াৰ এপটো ডাউনলোড কৰি তাৰ বাবে পঞ্জীয়ন কৰিব পাৰে ।
