ৰঙাপৰা, 31 মে’ : শোণিতপুৰ জিলাৰ ৰঙাপৰাত শুকুৰবাৰে এজন যুৱকৰ মৃতদেহ উদ্ধাৰ হোৱাৰ ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে । বহিঃৰাজ্যৰ পৰা আহি থকা যুৱকজনৰ ৰহস্যজনকভআৱে মৃত্যু হয় ৷
ঘটনাৰ বিৱৰণী অনুসৰি আজি পুৱাৰ ভাগত বালিপৰা চাহ বাগিচাৰ লোক্ৰাৰ নিবাসী ঘাচিয়া ওৰাঙৰ পুত্ৰ সোনা ওৰফে ৰাহুল ওৰাঙৰ মৃতদেহ ৰঙাপৰা আৰক্ষী থানাৰ অন্তৰ্গত নাহৰণি চাহ বাগিচাৰ 7 (বি) শাখাৰ এডাল গছত চিপ লাগি ওলমি থকা একাংশ স্থানীয় ৰাইজে প্ৰত্যক্ষ কৰে ।
লগে লগে স্থানীয় লোকে স্থানীয় আৰক্ষীৰ ঘটনা সন্দৰ্ভত অৱগত কৰে ৷ ঘটনাৰ খবৰ পোৱাৰ পাচতে ৰঙাপৰা আৰক্ষী থানাৰ এটা আৰক্ষীৰ দল ঘটনাস্থলীত উপস্থিত হয় । আৰক্ষীয়ে ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে ৷
ইপিনে ঘটনাৰ খবৰ পোৱাৰ পাচত সোনা ওৰাঙৰ পৰিয়ালৰ লোক ৰঙাপৰা আৰক্ষী থানাত উপস্থিত হয় । পৰিয়ালৰ লোকে এয়া এক পৰিকল্পিত হত্যাকাণ্ড বুলি সন্দেহ প্ৰকাশ কৰি ৰঙাপৰা আৰক্ষীক এই ঘটনাৰ উচিত তদন্ত কৰিবলৈ দাবী জনাইছে ।
ঘৰৰ লোকে কোৱা অনুসৰি, বেংগালুৰুত কৰ্মৰত আছিল ৰাহুল ৷ যুৱকজনে ৰে’লযোগে নিজগৃহৰ অভিমুখে আহি আছিল ৷ যদিও যুৱকজনে ঘৰৰ লোকক আহি থকাৰ কথা অৱগত কৰা নাছিল ৷ হঠাৎ এনেদৰে যুৱকজনে চিপ লৈ বাগানৰ মাজত আত্মহত্যা কৰাৰ ঘটনা পৰিয়ালৰ লোকে সহজভাৱে মানি ল’ব পৰা নাই ৷
যুৱকজনক কোনো দুর্বৃত্তই হত্যা কৰি গছত ওলোমাই থৈ যোৱা বুলি একাংশ লোকে সন্দেহ প্ৰকাশ কৰিছে । যুৱকজনৰ মৃত্যু হোৱা স্থানত এটা বেগ আৰু খালী মানিবেগ আৰক্ষীয়ে উদ্ধাৰ কৰিছে ৷ অৱশ্যে এতিয়ালৈ যুৱকজনে ব্যৱহাৰ কৰা মোবাইল ফোনটো উদ্ধাৰ কৰিবলৈ সক্ষম হোৱা নাই আৰক্ষীয়ে ।
মানিবেগটোৰ পৰা উদ্ধাৰ হোৱা ৰে’লৰ টিকেটৰ তথ্য অনুসৰি বৃহস্পতিবাৰে যুৱকজনে কামাখ্যা ৰে’লৱে জংচনৰ পৰা ৰঙাপৰাৰ অভিমুখে যাত্রীবাহী ৰে’লেৰে আহিছিল । সম্প্ৰতি ৰঙাপৰা আৰক্ষীয়ে সমগ্ৰ ঘটনা সন্দৰ্ভত তদন্ত অব্যাহত ৰাখিছে ৷ আৰক্ষীৰ তদন্তৰ পিচতহে এয়া হত্যা নে আত্মহত্যাৰ ঘটনা পোহৰলৈ আহিব ৷
লগতে পঢ়ক: কেনেকৈ নাগালেণ্ড পায়গৈ অসমত চুৰি হোৱা স্কুটী-মটৰ চাইকেল - Scooty stolen from Sonari
