হাফলং, 5 আগষ্ট : শনিবাৰে ডালমিয়া চিমেন্ট ফেক্টৰীত সংঘটিত হৈছিল এক শোকাৱহ দুৰ্ঘটনা ৷ ফেক্টৰী চৌহদত হোৱা এক দুৰ্ঘটনাত 5 জনকৈ শ্ৰমিকৰ মৃত্যু ঘটাৰ লগতে 7 জনকৈ শ্ৰমিক আঘাতপ্ৰাপ্ত হোৱা বুলি অভিযোগ উত্থাপন হৈছিল ৷ অৱশ্যে সংশ্লিষ্ট কৰ্তৃপক্ষই এই দুৰ্ঘটনাত শ্ৰমিক আহত হৈছে বুলিহে সদৰী কৰিছে ৷ সমান্তৰালভাৱে ইয়াৰ পাচতে সংশ্লিষ্ট কৰ্তৃপক্ষৰ বিৰুদ্ধে বিভিন্ন অভিযোগ ৷
উমৰাংচুৰ ডালমিয়া চিমেন্ট ফেক্টৰীৰ দ্বিতীয়টো নতুন প্ৰজেক্ট সংঘটিত শেহতীয়া দুৰ্ঘটনাটোৰ বাবে সংশ্লিষ্ট কৰ্তৃপক্ষই দায়ী বুলি শ্ৰমিকসকলে অভিযোগ তুলিছে । আনকি প্ৰকল্পটোত নিয়োজিত এগৰাকী শ্ৰমিকে ডালমিয়া চিমেন্ট ফেক্টৰীৰ দ্বিতীয়টো প্ৰজেক্টত ব্যৱহৃত সকলো ক্ৰেং বেয়া হৈ পৰিছে বুলিও সংবাদ মাধ্যমৰ আগত উল্লেখ কৰিছে । যাৰ বাবে শ্ৰমিকসকলৰ জীৱনৰ প্ৰতি ভাবুকিৰ সৃষ্টি হোৱা দেখিবলৈ পোৱা গৈছে ৷
ইয়াৰোপৰি, ডালমিয়া চিমেন্ট কৰ্তৃপক্ষ ফেক্টৰীত নিয়োজিত শ্ৰমিকসকলৰ সুৰক্ষা সম্বন্ধীয় বিষয়টোৰ প্ৰতি সম্পূৰ্ণ উদাসীন বুলিও গুৰুতৰ অভিযোগ তুলিছে । সংবাদ মাধ্যমৰ আগত শেহতীয়া দুৰ্ঘটনাটো সন্দৰ্ভত জানিবলৈ দি শ্ৰমিকগৰাকীয়ে কয়, "যোৱা 3 আগষ্টৰ সন্ধিয়া 6:50 বজাত ডালমিয়া চিমেন্টৰ দ্বিতীয়টো প্ৰজেক্টত ব্যৱহৃত ক্ৰেং টাৱাৰ ভাঙি পৰাৰ ফলত ইয়াৰ তলত 15 গৰাকীকৈ শ্ৰমিক পৰি যায় । কিন্তু সমগ্ৰ বিষয়টো ডালমিয়া কৰ্তৃপক্ষই গাপ দিয়াৰ চেষ্টা চলাইছে । কিমানজনক চিকিৎসালয়লৈ প্ৰেৰণ কৰা হৈছে আমি নাজানো ৷ আচলতে আমি একোৱেই নাজানো ৷ আমাৰ ইয়াত কোনো সুৰক্ষা নাই ৷ আমাক গেট পাছো দিয়া নাই ৷ চিকিৎসাৰ সুবিধাও প্ৰদান কৰা নাই ৷"
লক্ষণীয় বিষয় যে, ভয়ংকৰ দুৰ্ঘটনাটোত শ্ৰমিকৰ মৃত্যু ঘটাৰ পাচৰে পৰা বাতৰি লিখা পৰ্যন্ত ডালমিয়া চিমেন্ট ফেক্টৰী চৌহদত সংবাদ কৰ্মীক প্ৰৱেশ কৰিবলৈ দিয়া নাই ডালমিয়া কৰ্তৃপক্ষই । ডালমিয়া কৰ্তৃপক্ষই বাহিৰৰ কোনো লোকে যাতে চৌহদৰ ভিতৰত প্ৰৱেশ কৰিব নোৱাৰে তাৰ প্ৰতি নজৰ ৰাখিবলৈ স্পষ্ট নিৰ্দেশনা নিৰাপত্তাৰক্ষীক প্ৰদান কৰা হৈছে বুলি জানিবলৈ দিছে নিৰাপত্তাৰক্ষীয়ে ।
সংশ্লিষ্ট আৰক্ষী-প্ৰশাসন তথা ৰাজ্যৰ শ্ৰম বিভাগে এই বিষয়টো সন্দৰ্ভত কি ব্যৱস্থা গ্ৰহণ কৰে সেয়া হ’ব পৰৱৰ্তী সময়ত গুৰুত্বপূৰ্ণ বিষয় ৷
