গোলাঘাট, 10 জুন: ই-ৰিক্সা চালকৰ অতপালি ৰোধৰ দাবীত মেৰাপানীৰ ট্ৰেকাৰ-উইংগাৰ চালক সমাজে সোমবাৰৰ পৰা গ্ৰহণ কৰিছে অনিৰ্দিষ্টকালীন চকাবন্ধৰ কাৰ্যসূচী । দেওবাৰে ফৰকাটিং ৰে’লৱে ষ্টেচনৰ সমীপত এগৰাকী উইংগাৰ চালকক ই-ৰিক্সা চালকৰ দলে গুৰুলা গুৰুলকৈ প্ৰহাৰ কৰাৰ অভিযোগ তুলি ক্ষোভিত হৈ পৰিছে উইংগাৰ, ট্ৰেকাৰ চালকসকল ।
অভিযোগ অনুসৰি, গোলাঘাট মেৰাপানী পথত যাত্ৰীবাহী বাহনসমূহত যাত্ৰী উঠোৱা-নমোৱা কৰাত বাধা প্ৰদান কৰি আহিছে ফৰকাটিঙৰ ই-ৰিক্সা চালকসকলে । অভিযোগ অনুসৰি পৰিবহন আইন উলংঘা কৰি ফৰকাটিঙৰ ই-ৰিক্সা চালকসকলে গোলাঘাট মেৰাপানী ৰাজ্যিক ঘাইপথত ই-ৰিক্সা চলাই আহিছিল ৷ ইয়াৰ বিৰোধিতা কৰি আহিছিল মেৰাপানীৰ যাত্ৰীবাহী বাহনৰ চালকসকলে ।
এই কথাতে ক্ষুণ্ণ হৈ দেওবাৰে কণপিতৌ দাস নামৰ এজন উংইগাৰ চালকক ফৰকাটিং অঞ্চলৰ একাংশ ই-ৰিক্সা চালকে বেয়াকৈ মাৰধৰ কৰে বুলি অভিযোগ উত্থাপন হৈছে । ইতিমধ্যে ঘটনাক কেন্দ্ৰ কৰি ফৰকাটিং আৰক্ষী চকীত এখন এজাহাৰ দাখিল কৰিছে মেৰাপানীৰ চালক সমাজে ।
ইফালে ফৰকাটিঙৰ ই-ৰিক্সা চালকৰ ভাবুকিত নিৰাপত্তাহীনতাত ভুগি সোমবাৰৰ পৰা কৰ্মবিৰতি পালন কৰি প্ৰতিবাদত বহিছে স্থানীয় চালকসকলে । প্ৰশাসনে সম্পূৰ্ণ নিৰাপত্তাৰ ব্যৱস্থা নকৰা পৰ্যন্ত গোলাঘাট-মেৰাপানী পথত যাত্ৰীবাহী ট্ৰেকাৰ-উইংগাৰৰ চলাচল বন্ধ হৈ থাকিব বুলি নিজৰ স্থিতি স্পষ্ট কৰিছে মেৰাপানীৰ চালকসকলে ।
