ডিফু: এইবাৰ বুলড'জাৰ চলিল কাৰ্বি আংলঙত । কাৰ্বি আংলঙৰ খেৰণিত ১০ টা পৰিয়ালৰ ঘৰত চলিল জিলা প্ৰশাসনৰ বুলড'জাৰ । গুৱাহাটী উচ্চ ন্যায়ালয়ৰ নির্দেশমর্মে সোমবাৰে পশ্চিম কাৰ্বি আংলং জিলাৰ খেৰণিৰ ১০ টা পৰিয়ালৰ বাসগৃহত জিলা প্রশাসনে উচ্ছেদ অভিযান চলায় ।
ছার্থে ফাংচ' নামৰ এগৰাকী ব্যক্তিৰ ২২ বিঘা ভূমি অবৈধভাৱে দখল কৰি থকাৰ বিৰুদ্ধে ব্যক্তিগৰাকীয়ে উচ্চ ন্যায়ালয়ৰ কাষ চাপিছিল । সুদীর্ঘকালৰ ন্যায় যুদ্ধৰ পাছত ছার্থে ফাংচ'ই ন্যায়ালয়ৰ পৰা ন্যায় লাভ কৰিছিল ।
গুৱাহাটী উচ্চ ন্যায়ালয়ে দখলীকৃত ভূমিত উচ্ছেদ চলাই ছার্থে ফাংচ'ক ভূমিখিনি গতাই দিবলৈ কার্বি আংলং স্বায়ত্তশাসিত পৰিষদৰ ৰাজহ বিভাগক নির্দেশ দিছিল । কিন্তু কিবা এক অজ্ঞাত কাৰণত বহু বছৰ ধৰি কাৰ্বি আংলং স্বায়ত্তশাসিত পৰিষদে উক্ত ভূমিখিনিত উচ্ছেদ চলোৱা নাছিল ।
তাৰ পিছত সোমবাৰে জিলা প্রশাসনৰ সহযোগত কার্বি আংলং স্বায়ত্তশাসিত পৰিষদৰ ৰাজহ বিভাগে ব্যাপক নিৰাপত্তাৰক্ষীসহ পুৱাতে আৰম্ভ কৰে উচ্ছেদ অভিযান । এক্সকেভেটৰ, বুলড'জাৰ আদি লৈ পুৱাতেই নিৰাপত্তাৰক্ষীসহ উক্ত স্থানত উপস্থিত হয় উচ্ছেদকাৰীৰ বিশাল বাহিনী ।
লগে লগে উক্ত ১০ টা পৰিয়ালৰ মাজত হাহাকাৰ পৰিস্থিতিৰ সৃষ্টি হয় । আনহাতে, উচ্ছেদ অভিযানৰ সময়ত অঞ্চলটোত এক চেপা উত্তেজনায়ো বিৰাজ কৰে । ইফালে উচ্ছেদৰ সম্মুখীন হোৱা পৰিয়ালকেইটাই বুলড'জাৰৰ সম্মুখলৈ আহি বাধা প্রদান কৰে যদিও নিৰাপত্তাৰক্ষীয়ে সেই বাধা নেওচি উচ্ছেদকার্য সম্পন্ন কৰে ।
উল্লেখ্য যে এই উচ্ছেদকাৰ্যক অবৈধ আখ্যা দিয়াৰ লগতে তেওঁলোকৰ ভূমি বলপূৰ্বক দখলৰ ষড়যন্ত্ৰ কৰা ভুক্তভোগীসকলে অভিযোগ কৰে । এগৰাকী ভুক্তভোগীয়ে কয়, "অসম চৰকাৰক আমি নমস্কাৰ কৰিছোঁ । চৰকাৰে আমাৰ পৰা ভোট লৈ ঘৰ ভাঙি দিছে । তুলিৰাম চৰকাৰ, এছ পি আৰু ডিচিৰ ওচৰলৈ গৈয়ো ভৰিত ধৰি কৈছিলোঁ ছাৰ আমাক এসপ্তাহৰ সময় দিয়ক । আমি গুৱাহাটী হাইকোৰ্টত আপীল কৰিছোঁ । যদি আমি মাটি পাওঁ তেনেহ'লে ইয়াত থাকিম । নহ'লে আমি নিজে নিজে ইয়াৰ পৰা গুচি যাম । কিন্তু আমাক গোচৰৰ ৰায়লৈকে সময় নিদিলে আৰু ততাতৈয়াকৈ উচ্ছেদ কৰিলে ।"
আন এগৰাকী ভুক্তভোগীয়ে কয়, "আমি ইয়াত দহটা পৰিয়াল আছিলোঁ । মুঠ সদস্য ৭০ জন । আমি ইয়াত ১৯০৭ চনৰে পৰা আছোঁ । এই মাটি আমি গাড়ো সম্প্ৰদায়ৰ লোকৰ পৰা ক্ৰয় কৰিছিলোঁ । আমি ইয়াত থকা ৭০ বছৰ হৈ গ'ল । কিন্তু আমাৰ মাটিত বেলেগৰ নামত পট্টা দিলে । ইয়াত কোনো ধৰণৰ জৰীপ কৰিবলৈ কোনো অহা নাই । কোনো জৰীপ নকৰাকৈ বেলেগৰ নামত পট্টা দিলে । তাৰ পিছত আমাক নোটিচ দিলে যে এই ভূমি আমাৰ নহয় । তাৰ পিছত আমি কেছ ফাইল কৰোঁ । হামৰেণৰ পৰা ডিফু তাৰ পৰা হাইকোৰ্টলৈ গোচৰ যায় । কিন্তু শুনানি নোহোৱাকৈ উচ্ছেদৰ জাননী দিয়ে ।"
ইফালে অঞ্চলটোত এতিয়া গৃহহাৰা পৰিয়ালকেইটা ক'লৈ যাব, কি খাব, সন্তানৰ পঢ়া-শুনা কি হ'ব তাক লৈ চর্চা চলিছে ।
