ধেমাজি, 6 এপ্ৰিল: আই অসমীৰ গা এতিয়া সাতখন আঠখন হৈছে ৷ ফাগুনে বিদায় মগাৰ পিচৰে পৰা ঢোলৰ গুমগুমনি, পেঁপা-গগনাৰ মাতত এতিয়া অসমৰ গছ-লতাও নাচি উঠা পৰিলক্ষিত হৈছে ৷ এই সময়ত ৰাজ্যৰ য’লৈকে কাণ দিয়ে তাতেই শুনিব নাচো নাচো লগা শব্দবোৰ ৷ তাৰ মাজতে তাঁতশালৰ খিটখিট শব্দটো আছেই ৷
- " class="align-text-top noRightClick twitterSection" data="">
ৰাজ্যৰ আন ঠাইসমূহৰ দৰে ধেমাজিতো একেই পৰিৱেশ ৷ চেনেহৰ দীঘ-বাণিৰে চেনাইলৈ বুলি বিহুৱান বোৱাত ব্যস্ত হৈ পৰিছে ধেমাজিৰ গ্ৰামাঞ্চলৰ মাইনী-তৰামাইহঁত ৷ গামোচাখন নহ’লে ক’তনো থাকে বিহুৰ মাদকতা ! বছৰেকৰ বিহুটোত আপোনজনক, পৰিয়ালৰ জ্যেষ্ঠজন-কনিষ্ঠজন আৰু আলহী-অতিথিকো একোখনকৈ বিহুৱান যঁচাটো এক পৰম্পৰা ৷
ধেমাজি নগৰৰ পৰা প্ৰায় ৮ কি:মি নিলগৰ ২ নং বৰাচিৰা গাঁৱৰ প্ৰায়সমূহ ঘৰতে শুনিবলৈ পোৱা গৈছে মাকোৰ খিটখিটনি, যঁতৰত মহুৰা ফুৰোৱা শব্দ ৷ গাঁওখনৰ চহা খেতিয়কৰ কিশোৰী, যুৱতী-বোৱাৰীসকল এতিয়া ব্যস্ত হৈ পৰিছে বিহুৱান বোৱাত ৷ এইবেলি বিহুৰ বাবে ১৮খন গামোচা তাঁতশালত বৈছে এখন বিশেষ ঘৰত ৷ ইয়াৰ পূৰ্বে কিছু ভমকাফুলীয়া, বুটাবছা গামোচা কাটিও সযতনে ৰাখিছে আপোনজনৰ বাবে ৷
ভাললগা কথাটো হ’ল, ঘৰখনৰ কিশোৰীগৰাকীয়ে এইবছৰ মেট্ৰিক পৰীক্ষা দি আজৰি হৈছেহে মাথোন ৷ পৰীক্ষা যোৱাৰ পিচৰে পৰাই অবাবত সময় নষ্ট নকৰি বা মোবাইল ফোনত ৰীলচ্ বনোৱাৰ পৰিৱৰ্তে তাঁতশালত সপোন ৰচাতহে ব্যস্ত হৈ পৰিছে মাইনী বৰগোহাঁই নামৰ কিশোৰীগৰাকী ৷ এয়াই হৈছে চহকী অসমীয়া সংস্কৃতি ৷ য’ত নিৰ্বাচনী শ্ল’গানেও তল পেলাব পৰা নোৱাৰে তাঁতশাল, ঢোল-পেঁপাৰ শব্দ ৷
লগতে পঢ়ক: ড্ৰাগছৰ বিৰুদ্ধে সজাগতাৰ লক্ষ্য়ৰে চাইকেলেৰে দেশ ভ্ৰমণ পৰ্বতাৰোহীৰ : বিহু নাচে আকৃষ্ট কৰিলে পৰ্যটকক
