কলিয়াবৰ,১৩ জুলাই: বানত জুৰুলা কলিয়াবৰবাসী । বানত হাহাকাৰ কৰি থকাৰ মাজতে সংঘটিত হয় এক শোকাবহ ঘটনা । কলিয়াবৰত সলিল সমাধি ঘটে এগৰাকী নৱম শ্ৰেণীত অধ্যয়নৰত ছাত্ৰীৰ । মৃত ছাত্ৰীগৰাকীৰ নাম ভূমিকা কাচুমাৰ । মিছা আৰক্ষী চকীৰ অন্তৰ্গত হাতীগাঁও চাহ-বাগিচাৰ বাসিন্দা ভূমিকা মিছাস্থিত কস্তুৰবা গান্ধী বিদ্যালয়ৰ ছাত্ৰী আছিল । ছাত্ৰীগৰাকী বিদ্যালয়ৰ ছাত্ৰী নিবাসতে থাকে যদিও গৰমৰ বন্ধত ঘৰলৈ আহিছিল ।
পিচে বাঢ়নী পানীত ভৰি-হাত ধুবলৈ বুলি যাওতেই পিচলি পৰি সন্ধানহীন হৈ আছিল ছাত্ৰীগৰাকী । ঘৰৰ লোকে বহু সময় ধৰি বিচাৰি পানীত ওপঙি থকা অৱস্থাত উদ্ধাৰ কৰি জখলাবন্ধা চিকিৎসালয়লৈ নিয়ে যদিও ভূমিকাক চিকিৎসকে মৃত বুলি ঘোষণা কৰে । ইতিমধ্যে মিছা আৰক্ষী উপস্থিত হৈ ঘটনাৰ তদন্ত আৰম্ভ কৰাৰ লগতে মৃতদেহ মৰণোত্তৰ পৰীক্ষাৰ বাবে প্ৰেৰণ কৰে ।
লগতে পঢ়ক: বানত প্ৰাণ হেৰুৱালে কাজিৰঙাৰ ১০ টা গঁড়সহ ১৭৪ টা বন্যপ্ৰাণীয়ে - Assam Flood 2024
শিলঘাটত বাঘৰ সন্ত্ৰাস:
"এনেই মৰিছোঁ ঋষিৰ শাপত, তাতে দিছে ধানৰ ভাপত" কলিয়াবৰীয়া ৰাইজৰো এতিয়া এনে এক অৱস্থা । বানৰ সমান্তৰালকৈ কলিয়াবৰত এতিয়া বাঘৰ আতংক । সোণাৰী-কামাখ্যা অঞ্চলত বন বিভাগে নিশ্চিত কৰিছে তিনিটা ঢেকীয়াপতীয়াৰ অৱস্থিতি । কলিয়াবৰ মহকুমা প্ৰশাসনে ইতিমধ্যে ৰাজহুৱা ঘোষণাযোগে সতৰ্ক কৰিছে কলিয়াবৰবাসীক ।
বিশেষকৈ শিলঘাট আৰু দাঁতিকাষৰীয়া ৰবৰ বাগান, কামাখ্যা গাঁও, সোণাৰী গাঁও, সোণাৰী চাহ বাগিচা অঞ্চলৰ ৰাইজক সতৰ্ক আৰু সজাগ হৈ থাকিবলৈ আহ্বান জনাইছে প্ৰশাসনে । সোণাৰী চাহ বাগিচাৰ ১৩ নম্বৰ লাইনত বাঘে নিধন কৰিছে দুটাকৈ পশুধন । কাজিৰঙা ৰাষ্ট্ৰীয় উদ্যানৰ বানৰ ফলত আশ্ৰয় বিচাৰি কলিয়াবৰৰ কামাখ্যা পাহাৰ আৰু নামনি অঞ্চলত বিচৰণৰ সন্দেহ প্ৰকাশ বন বিভাগৰ ।
লগতে পঢ়ক:বানবিধ্বস্ত মাজুলীত অব্যাহত বাঘৰ আতংক - Tiger Terror At Majuli
প্ৰশাসনৰ নিষেধাজ্ঞা জাৰি:
বাঘৰ সন্ত্ৰাসৰ প্ৰতি লক্ষ্য ৰাখি বিশেষকৈ শিলঘাট আৰু দাঁতিকাষৰীয়া ৰবৰ বাগান, কামাখ্যা গাঁও, সোণাৰী গাঁও, সোণাৰী চাহ বাগিচা অঞ্চলৰ ৰাইজক সজাগ আৰু সতৰ্ক হৈ থাকিবলৈ আহ্বান জনাইছে প্ৰশাসনে । ইতিমধ্যে মহকুমা প্ৰশাসনে ভাৰতীয় নাগৰিক সুৰক্ষা সংহিতা, ২০২৩ৰ ধাৰা ১৬৩ (১)ৰ অধীনত কলিয়াবৰ চাহ বাগিচাৰ মাজেৰে যোৱা শিলঘাট-কামাখ্যা মন্দিৰ-সোণাৰী গাঁও সংযোগী গড়কপ্তানী পথৰ লগতে শিলঘাট-ৰবৰবাৰীৰ পৰা ত্ৰিশূলধাৰী মন্দিৰ সংযোগী পথত নিষেধাজ্ঞা জাৰি কৰে । বিয়লি ৪ বজাৰ পৰা পুৱা ৯ বজালৈকে এই পথ দুটাৰে যাতায়ত কৰাত নিশেধাজ্ঞা জাৰি কলিয়াবৰ মহকুমা প্ৰশাসনৰ ।
লগতে পঢ়ক: বাঘৰ আতংকত ভুগিছে কলিয়াবৰবাসীয়ে - Tiger Scare In Kaliabar
জাপানীজ এনকেফেলাইটিছৰ আতংক:
বান আৰু বাঘৰ আতংকৰ মাজতে জাপানীজ এনকেফেলাইটিছৰ প্রাদুর্ভাবে অধিক আতংকিত কৰি তুলিছে কলিয়াবৰবাসীক । ইতিমধ্যে এজনৰ দেহত ধৰা পৰিছে জাপানীজ এনকেফেলাইটিছৰ লক্ষণ । আক্ৰান্ত লোকজন বৰ্তমান চিকিৎসাধীন হৈ আছে গুৱাহাটীত । আক্ৰান্ত ব্যক্তিজন কলিয়াবৰ সোণাৰী গাঁৱৰ সুজিৎ কুমাৰ চাংমাই বৰুৱা বুলি জানিব পৰা গৈছে । পৰিয়ালৰ লোকে জনোৱা অনুসৰি কিছুদিনৰ পৰা জ্বৰত ভুগি আছিল ব্যক্তিজন । স্থানীয় চিকিৎসকৰ পৰামৰ্শ অনুসৰি ব্যক্তিজন গুৱাহাটীৰ এখন ব্যক্তিগত চিকিৎসালয়ত জটিল অৱস্থাত চিকিৎসাধীন হৈ আছে বুলি জানিব পৰা গৈছে ।
লগতে পঢ়ক:১৫ আগষ্টৰ ভিতৰত সকলো ক্ষতিগ্ৰস্তই পাব সাহায্য: অতুল বৰা - Assam Flood 2024
