তিনিচুকীয়া, ৩ আগষ্ট : ২০২০ বৰ্ষতে ৰাজ্য চৰকাৰে নতুনকৈ গঠন কৰিছিল তিনিখনকৈ স্বায়ত্তশাসিত পৰিষদ ৷ তাৰ ভিতৰত অন্যতম মৰাণ স্বায়ত্তশাসিত পৰিষদ । কিন্তু বৰ্তমান কেনেকৈ চলি আছে এই মৰাণ স্বায়ত্তশাসিত পৰিষদৰ কাৰ্যালয় । জানিলে আপুনিও আচৰিত হ'ব ।
মৰাণ স্বায়ত্তশাসিত পৰিষদৰ দুৰৱস্থা :
অভিযোগ অনুসৰি সম্প্ৰতি মৰাণ স্বায়ত্তশাসিত পৰিষদৰ নাই পৰ্যাপ্ত পুঁজি । পৰিষদৰ কাৰ্যালয়ত কৰ্মচাৰীৰ অভাৱ । একপ্ৰকাৰ জোৰা-টাপলি মাৰিয়ে চলি আছে মৰাণ স্বায়ত্তশাসিত পৰিষদ ৷ তিনিচুকীয়াৰ বৰগুৰিস্থিত মৰাণ স্বায়ত্তশাসিত পৰিষদৰ কাৰ্যালয়ৰ চাৰিওফালে হাবি-জংঘলে আৱৰি ধৰিছে । কাৰ্যালয়টো পৰিষ্কাৰ কৰিবলৈও নাই কোনো কৰ্মচাৰী !
প্ৰায় ৪ বছৰ পূৰ্বে ৰাজ্য চৰকাৰে আইন প্ৰণয়ন কৰি নতুনকৈ গঠন কৰিছিল মৰাণ, মটক আৰু কমতাপুৰ স্বায়ত্তশাসিত পৰিষদ ৷ কিন্তু গঠন কৰিয়েই যেন দায়িত্ব সামৰিলে চৰকাৰে ৷
অভিযোগ অনুসৰি মৰাণ স্বায়ত্তশাসিত পৰিষদক চৰকাৰে দিয়া নাই পৰ্যাপ্ত পুঁজি, নিয়োগ কৰা নাই চৰকাৰী কৰ্মচাৰী ৷ যাৰ বাবে মৰাণ স্বায়ত্তশাসিত পৰিষদৰ কাৰ্যালয়ত এতিয়া অচলাৱস্থা ৷ জানিব পৰা মতে কেৱল মাত্ৰ এজন প্ৰধান সচিবৰ জৰিয়তে চলিছে মৰাণ স্বায়ত্তশাসিত পৰিষদৰ প্ৰশাসনিক কাম কাজ ৷
বিভিন্ন সংগঠনৰ দাবী :
'কণা হাঁহক পতান দিয়া' নীতিৰে ৪ বছৰত মৰাণ জনগোষ্ঠীৰ উন্নয়নৰ বাবে স্বায়ত্তশাসিত পৰিষদক চৰকাৰে দিলে মাত্ৰ ৪ কোটি টকা ৷ যাৰ বাবে ক্ষোভিত হৈ আন্দোলনৰ হুংকাৰ দিছে মৰাণ ছাত্ৰ সন্থাকে ধৰি জনগোষ্ঠীটোৰ বিভিন্ন দল-সংগঠনে ।
তাৰোপৰি বিধিগত নীতি অনুসৰি ২০২১ বৰ্ষত জনগোষ্ঠীটোৰ ৰাইজে গঠন কৰি দিয়া অন্তৱৰ্তীকালীন মৰাণ স্বায়ত্তশাসিত পৰিষদৰ নিৰ্বাচন ৬ মাহৰ ভিতৰত অনুষ্ঠিত কৰিব লাগিছিল যদিও বৰ্তমানলৈকে চৰকাৰে নিৰ্বাচন অনুষ্ঠিত নকৰিলে ৷ পৰিষদৰ নিৰ্বাচন অনুষ্ঠিত নকৰাক লৈ মৰাণ জনগোষ্ঠী ৰাইজৰ মাজত ব্যাপক ক্ষোভৰ সৃষ্টি হৈছে । সেয়ে চলিত বৰ্ষতেই নিৰ্বাচন অনুষ্ঠিত কৰিবলৈ দাবী জনাইছে অসম মৰাণ সভাকে ধৰি জনগোষ্ঠীটোৰ কেইবাটাও সংগঠনে ৷
