বাইহাটা,৭ ছেপ্টেম্বৰ: এসময়ৰ এগৰাকী সশস্ত্ৰ আলফা সংগ্ৰামী আজি এগৰাকী আদৰ্শ খেতিয়ক । কৃষিৰে জিনিছে সকলোৰে মন । কামৰূপ জিলাৰ বাইহাটা চাৰিআলিৰ সমীপৰ কলমণি গাঁৱৰ প্ৰাক্তন আলফা সদস্য বলীন কলিতা এতিয়া এগৰাকী আদৰ্শ খেতিয়ক । কৃষিকৰ্মৰে নিজৰ লগতে আন কেইবাগৰাকী লোককো স্বাৱলম্বী কৰি তুলিবলৈ সক্ষম হৈছে প্ৰাক্তন আলফা সদস্য বলীন কলিতাই । সশস্ত্ৰ সংগ্ৰাম পৰিহাৰ কৰি বিগত ২৪ বছৰে নিজকে নিয়োজিত কৰিছে কৃষিকৰ্মৰ লগত ।
অতি উদ্যমী তথা পৰিশ্ৰমী বলীন কলিতাই ১৯৯৬ চনত আলফাত যোগদান কৰে আৰু ২০০০ চনত এই সশস্ত্ৰ সংগ্ৰাম পৰিহাৰ কৰি আত্মসমৰ্পনৰ জৰিয়তে হিংসাৰ পথ পৰিহাৰ কৰি মূলসুঁতিলৈ উভতি আহে । তাৰপিছৰে পৰা বলীন কলিতাই যেন পিছলৈ ঘূৰি চাব লগা হোৱা নাই । তেওঁ আৰম্ভ কৰিলে হাঁহ পালন, গাহৰি পালন, মীন পালনৰ লগতে ছাগলী পালন । ইয়াৰ সমান্তৰালকৈ বলীন কলিতাই গঢ়ি তুলিলে এখন নেমু টেঙাৰ বাগান ।
ইয়াৰ উপৰিও কচু খেতি, কলৰ বাগানেৰে এতিয়া বছৰি লাখ লাখ টকা উপাৰ্জন কৰিবলৈ সক্ষম হৈছে একালৰ কাচিনত প্ৰশিক্ষণপ্ৰাপ্ত আলফা সদস্য তথা বৰ্তমানৰ এগৰাকী আত্মসমৰ্পনকাৰী আলফা সদস্য বলীন কলিতাই । কি নাই বলীন কলিতাৰ এইখন কৃষিপামত ! লমালমে লাগি আছে ভোল আৰু জিকাকে ধৰি বিভিন্ন শাক-পাচলি । লগতে হাঁহ, কুকুৰা, ছাগলী, গাহৰিৰে উভৈনদী কলিতাৰ কৃষিপাম । এতিয়া এনেদৰে নিজৰ লগতে আন কেবাজনকো স্বাৱলম্বিতাৰ পথ দেখুৱাবলৈ সক্ষম হৈছে এইগৰাকী প্ৰাক্তন আলফা সদস্যই ।
পিচে আজিলৈকে কোনো চৰকাৰী সাহাৰ্য লাভ নকৰা বলীন কলিতা আজি দহজনৰ বাবে আদৰ্শৰ কাৰণ হৈ পৰিছে । কেৱল চৰকাৰী চাকৰিৰ পিছত হাবাথুৰি খাই নুফুৰি এনেদৰে কৃষিকৰ্মৰ জৰিয়তে যে নিজকে স্বাৱলম্বী হিচাপে প্ৰতিষ্ঠিত কৰিব পাৰি তাৰেই নিদৰ্শন দেখুৱাইছে প্ৰাক্তন আলফা সদস্য বলীন কলিতাই ।
