তেজপুৰ, 29 মে' : জ্যোতি ভাৰতীত এতিয়া তেজপুৰৰ লগতে ৰাজ্যৰ ভিন্ন প্ৰান্তৰ তবলা বাদকসকলে ভিৰ কৰিছে ৷ কাৰণ ভাৰতবৰ্ষৰ সংগীত জগতৰ বিখ্যাত তবলা বাদক তথা গুৰুসকলৰ প্ৰিয় কাৰিকৰজন আহিছে তেজপুৰৰ জ্যোতি ভাৰতীলৈ ৷ যাৰ হাতত প্ৰাণ পাই উঠে সংগীতৰ এক অপৰিহাৰ্য অংগ তবলাই ৷ জ্যোতি ভাৰতীৰ তবলাসমূহত নিখুঁত পৰশ দিবলৈ, জ্যোতি ভাৰতীৰ ভাৰপ্ৰাপ্ত বিষয়াগৰাকীৰ আমন্ত্ৰণ ক্ৰমে তেজপুৰ চহৰত প্ৰথমবাৰৰ বাবে উপস্থিত হ’ল তবলাৰ এই কাৰিকৰজন ৷
কোন এই বিখ্যাত তবলাৰ খনিকৰ :
শাস্ত্ৰীয় সংগীতৰ লগতে প্ৰায় সকলো সংগীতৰ এক অপৰিহাৰ্য অংগ তবলাত নিখুঁত পৰশ দিবলৈ জ্যোতি ভাৰতীত উপস্থিত হোৱা প্ৰখ্যাত কাৰিকৰজন হৈছে কলকাতাৰ শান্তো দাস ৷ অসম চৰকাৰৰ ৰাজ্যিক সংগীত মহাবিদ্যালয়ত 2014 চনৰ পৰাই কলকাতাৰ পৰা আহি তবলা প্ৰস্তুত কৰি আহিছে তেওঁ ৷ জ্যোতি ভাৰতীৰ প্ৰচেষ্টাত প্ৰথমবাৰৰ বাবে সাংস্কৃতিক নগৰী তেজপুৰত উপস্থিত হোৱা কাৰিকৰজনে চহৰৰ বিভিন্ন তবলা বাদক সকলক তেওঁলোকৰ বাদ্য সমূহ নিখুঁতভাবে সুৰৰ লহৰ দিব পৰাকৈ প্ৰস্তুত কৰি দিছে ৷
তেওঁ তবলাৰ ওস্তাদ পণ্ডিত কুমাৰ বসু , ওস্তাদ অনিন্দ চেটাৰ্জীৰ তবলা প্ৰস্তুত কৰে ৷ এক কথাত শান্তো দাস নহ’লে তবলাৰ ওস্তাদসকলৰ আঙুলিৰ বোল হৃদয়স্পৰ্শী নহয় ৷ তবলা শাস্ত্ৰীয় সংগীতৰ প্ৰধান বাদ্য, তবলা নহ’লে তাল মিলাই যি কোনো এটা গীত পৰিৱেশন কৰাটো অসম্ভৱ ৷ বৰ্তমান জ্যোতি সংগীত, বিষ্ণু ৰাভা সংগীত আৰু ভূপেন্দ্ৰ সংগীত সকলোতে তবলাৰ বিশেষ ভূমিকা আছে ৷ জ্যোতি ভাৰতীত সংগীতৰ চর্চা আৰু জ্যোতি-বিষ্ণু-ভূপেন্দ্ৰ সংগীত শুদ্ধ স্বৰলিপিৰে গীত শিকোৱা হয় আৰু তাৰ বাবে প্ৰয়োজনীয় এক বাদ্য হৈছে তবলা ৷ এই গীতসমূহ শুদ্ধ স্বৰত পৰিৱেশন কৰিবলৈ কাৰিকৰজনৰ হাতেৰে এই তবলাসমূহ নিখুঁতভাবে তৈয়াৰ কৰি লোৱা হৈছে ৷ লগতে তেজপুৰ চহৰ আৰু অসমৰ ভিন্ন প্ৰান্তৰ তবলা বাদকসকলে এতিয়া জ্যোতি ভাৰতীলৈ আহি শান্তো দাসৰ হাতেৰে নিজৰ তবলাযোৰ প্ৰস্তুত কৰি লৈছে ৷
লগতে পঢ়ক : কৃষিকৰ্মৰে বছৰি ২০ লাখ টকা উপাৰ্জন কৰা জন কুম্বাং - Self Reliant Cultivator
