বিশ্বনাথ, 21 জুলাই : বিহালী আৰক্ষী থানাৰ অন্তৰ্গত বুৰৈ ঘাটৰ 1 নং ননকে বিহমাৰীত নিশা সংঘটিত হয় এক নৃশংস হত্যাকাণ্ড ৷ বিহালী সমষ্টিৰ বুৰৈ ঘাটৰ ননকে বিহমাৰী গাঁৱত নিশাৰ ভাগত দুৰ্বৃত্তই এজন লোকক নিজ ঘৰৰ ভিতৰতে নৃশংসভাৱে হত্যা কৰা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে ৷ পুৱাৰ ভাগত স্থানীয় লোকে তেজেৰে লুতুৰি পুতুৰি হৈ মজিয়াত পৰি থকা অৱস্থাত প্ৰত্যক্ষ কৰে ব্যক্তিজনৰ মৃতদেহ ৷
জানিব পৰা মতে অকলশৰে বসবাস কৰা শান্তিলাল শ্ৰেষ্ঠ নামৰ লোকজনক নিশাৰ ভাগত কোনো দুৰ্বুত্তই নিজ গৃহৰ ভিতৰতে হত্যা কৰি পেলাই থৈ যায় ৷ এই ঘটনা পোহৰলৈ আহে দেওবাৰে পুৱা 10 মান বজাত ৷ ব্যক্তিজন পুৱা ঘৰৰ পৰাই ওলাই নহাত কাষতে থকা ভাতৃয়ে খবৰ ল’বলৈ ঘৰলৈ গৈ মৃতদেহটো দেখা পাই ৷ লগে লগে স্থানীয় লোক আৰু পৰিয়ালে বিহালী আৰক্ষী আৰু গাঁওৰক্ষী বাহিনীক ঘটনা সন্দৰ্ভত অৱগত কৰে ৷
ইয়াৰ পিচতে বিহালী আৰক্ষী আৰু দণ্ডাধীশ ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বিহালী চিকিৎসালয়লৈ প্ৰেৰণ কৰে ৷ উল্লেখযোগ্য যে অতি সহজ সৰল তথা দিন হাজিৰা কৰি খোৱা শান্তিলালক কোনে কি কাৰণত হত্যা কৰিলে তাকে লৈ আশ্বৰ্য প্ৰকাশ কৰিছে স্থানীয় ৰাইজে ৷ ইফালে ঘটনাস্থলীত বিশ্বনাথ জিলা উপ আৰক্ষী অধীক্ষককে ধৰি বিহালী আৰক্ষীৰ দল উপস্থিত হৈ কুকুৰৰ জৰিয়তে তদন্ত আৰম্ভ কৰিছে ৷ বৰ্তমান সময়লৈকে কোনো লোকক এই সন্দৰ্ভত আৰক্ষীয়ে আটক কৰা নাই ৷
লগতে পঢ়ক : মুকালমুৱা এনকাউন্টাৰ: আত্মৰক্ষাৰ বাবেহে নলবাৰী আৰক্ষীয়ে গুলীয়ালে ডকাইত হামিদ আলীক - POLICE FIRING IN NALBARI
