সৰুপথাৰ, 31 জুলাই : কিছু সময়ৰ পিচতেই পেৰিছ অলিম্পিকত বক্সিঙৰ ৰিঙত নামিব অসমকন্যা লাভলীনা বৰগোহাঁই ৷ ইতিমধ্যে লাভলীনাৰ খেলক লৈ এতিয়া সকলোৱে উৎকণ্ঠাৰে বাট চাইছে ৷ সকলোৱেই আশা কৰিছে এইবাৰ অলিম্পিকত স্বৰ্ণ জয় কৰক লাভলীনাই ৷ লাভলীনাৰ গৃহস্থান বৰপথাৰত দল-সংগঠন, ৰাইজে একেলগে খেল চাবলৈ একত্ৰিত হৈছে ৷ ধনশিৰি মহকুমা ছাত্ৰ সন্থাই লাভলীনাৰ খেল উপভোগ কৰিবলৈ ব্যৱস্থা কৰিছে বিশেষ স্ক্ৰীণিঙৰ ৷
ইফালে আজি পুৱাৰ ভাগতে ঐতিহ্যমণ্ডিত বৰপথাৰৰ দুৱৰণি শিৱ মন্দিৰ প্ৰাৰ্থনাৰে মুখৰিত হয় ৷ লাভলীনা বৰগোহাঁইৰ হৈ পৱিত্ৰ শাওন মাহৰ আজিৰ দিনটোত বৰপথাৰৰ স্থানীয় ৰাইজ তথা ভাৰতীয় জনতা যুৱ মৰ্চাৰ বিষয়ববীয়াই আশীৰ্বাদ বিচাৰি আৰাধনা কৰা পৰিলক্ষিত হৈছিল ৷ কোনোৱে যদি ধূপ-চাকি, ফুল-বেলপাতেৰে সেৱা লয়, কোনোৱে শৰাই আগবঢ়াই সেৱা লোৱা পৰিলক্ষিত হয় ৷ লাভলীনাই যাতে অলম্পিকত সোণৰ পদক কঢ়িয়াই আনিবলৈ সক্ষম হয়, তাৰ বাবে আশিস বিচাৰি দুৱৰণিৰ শিৱ মন্দিৰত পূজা-অৰ্চনা কৰে ৰাইজে ৷
উল্লেখ্য যে, পেৰিছ অলিম্পিকৰ 75 কেঃজিঃ মহিলা শাখাৰ বক্সিং ৰিঙত আজি অৱতীৰ্ণ হ'ব অসমকন্যা লাভলীনা বৰগোহাঁই ৷ বিয়লি 3.50 মিনিটত ন'ৰৱেৰ বক্সাৰ ছুন্নিভা হফষ্টেডৰ বিৰুদ্ধে ৰিঙত নামিব লাভলীনা ৷ আজিৰ লাভলীনাৰ খেলক লৈ উৎসাহী হৈ পৰিছে ৰাজ্যবাসী ৷ ৰাজ্যৰ বিভিন্ন প্ৰান্তৰ লগতে সৰুপথাৰতো "গ' ফৰ গল্ড লাভলীনা" শীৰ্ষক অনুষ্ঠানেৰে লাভলীনাক শুভেচ্ছা প্ৰদান কৰিছে বিভিন্নজনে ৷ টকিঅ' অলিম্পিকত ব্ৰঞ্জৰ পদক বিজয়ৰ পিচত এইবাৰ পেৰিছ অলিম্পিকত অংশ লৈছে লাভলীনাই ৷ এইবাৰৰ পেৰিছ অলিম্পিক 2024ত ভাৰতীয় দলৰ হৈ অসমৰ একমাত্ৰ খেলুৱৈ হিচাপে অংশ লৈছে লাভলীনা বৰগোহাঁয়ে ৷
লগতে পঢ়ক : লাভলীনাৰ স্বৰ্ণ জয়ৰ বাবে শিৱমন্দিৰত আশিস বিচাৰিলে ৰাইজে - Paris Olympics 2024
