গুৱাহাটী, 24 জুন : দীৰ্ঘদিনীয়া অপেক্ষাৰ অন্ত পৰিল ৷ অৱশেষত ভাৰতীয় জাতীয় ক্ৰিকেট দলত স্থান লাভ কৰিবলৈ সক্ষম হ’ল বিস্ফোৰক বেটছমেন তথা অসম সন্তান ৰিয়ান পৰাগে ৷ শেহতীয়াকৈ ঘোষণা কৰা ভাৰতীয় T-20 দলত স্থান লাভ কৰিলে অসম সন্তানগৰাকীয়ে ৷ জিম্বাবৱেৰ বিৰুদ্ধে অনুষ্ঠিত হ’বলগীয়া T-20 শৃংখলাৰ ভাৰতীয় দলৰ অংশ হ’ব ৰিয়ান পৰাগ ৷
বি চি চি আইয়ে (BCCI) সোমবাৰে জিম্বাবৱেৰ বিৰুদ্ধে অনুষ্ঠিত হ’বলগীয়া পাঁচখনীয়া মেচৰ T-20 শৃংখলাৰ বাবে ভাৰতীয় দল ঘোষণা কৰে ৷ ভাৰতীয় ক্ৰিকেটৰ নতুন প্ৰতিভাৰে গঠিত এই দলত ৰিয়ান পৰাগে স্থান লাভ কৰাৰ পাচতেই উৎফুল্লিত হৈ পৰিছে তেওঁৰ পিতৃ-মাতৃৰ লগতে ৰাজ্যবাসী ৷ এই সন্দৰ্ভত গুৱাহাটীৰ খাৰঘূলিৰ বাসগৃহত ৰিয়ান পৰাগৰ পিতৃয়ে সাংবাদিকসকলৰ আগত ক্ৰিকেটাৰগৰাকীয়ে ভাৰতীয় দলত স্থান লাভ কৰাত আনন্দ প্ৰকাশ কৰে ৷
উল্লেখ্য যে ৰিয়ান পৰাগ ভাৰতীয় পুৰুষ জাতীয় দলত স্থান লাভ কৰা অসম তথা উত্তৰ-পূবৰ প্ৰথমগৰাকী ক্ৰিকেটাৰ ৷ ইয়াৰ পূৰ্বে অসম তথা উত্তৰ-পূৰ্বাঞ্চলৰ কোনো ক্ৰিকেটাৰে ভাৰতীয় জাতীয় দলত স্থান লাভ কৰিবলৈ সক্ষম হোৱা নাছিল ৷ ৰাজস্থান ৰয়েলছৰ খেলুৱৈ তথা অসম ৰঞ্জী দলৰ অধিনায়ক ৰিয়ান পৰাগে শেহতীয়াকৈ ঘৰুৱা আৰু আই পি এলত সুন্দৰ প্ৰদৰ্শন কৰিছিল ৷ ধাৰাবাহিক বিফলতাৰ অন্তত ৰিয়ান পৰাগে 2024 বৰ্ষৰ আই পি এলত ৰাজস্থান ৰয়েলছৰ হৈ 15 খন মেচত 4 টা অৰ্ধশতকেৰে 573 ৰাণ সংগ্ৰহ কৰিছিল ৷ তেওঁৰ প্ৰদৰ্শনে দৃষ্টি আকৰ্ষণ কৰিছিল নিৰ্বাচকসকলক ৷
