বৰপেটা,২৭ জুন: মুখ্যমন্ত্ৰী ড৹ হিমন্ত বিশ্ব শৰ্মাই বৃহস্পতিবাৰে সন্ধিয়া ঐতিহ্যমণ্ডিত বৰপেটা সত্ৰত উপস্থিত হৈ সত্ৰখনৰ মেৰামতিৰ কামৰ আৰম্ভণি কৰে । সত্ৰখনৰ মূল গৃহৰ পুৰণি হোৱা টিনপাতকে মুখ্য কৰি কেবাটাও স্থানত মেৰামতিৰ প্ৰয়োজন হৈছে । এই বিষয়ে বৰপেটা সত্ৰ পৰিচালনা সমিতিয়ে যোৱা দৌলোৎসৱৰ সময়ত মুখ্যমন্ত্ৰীক অৱগত কৰিছিল । ইয়াৰ পাচতে মুখ্যমন্ত্ৰীয়ে সত্ৰৰ মেৰামতিৰ নামত এক কোটি টকা আৱণ্টন দিয়ে ।
আৱণ্টিত সেই ধনেৰে সত্ৰ পৰিচালনা সমিতিয়ে বৃহস্পতিবাৰৰে পৰা টিনপাত সলনিৰ কাম মুখ্যমন্ত্ৰীৰ উপস্থিতিত আৰম্ভ কৰে । নলবাৰীত অনুষ্ঠিত কেবিনেট বৈঠকৰ পাচত বৰপেটা সত্ৰত উপস্থিত হোৱা মুখ্যমন্ত্ৰী হিমন্ত বিশ্ব শৰ্মাই সত্ৰখনৰ উন্নয়নমূলক কাম-কাজক লৈ সত্ৰ পৰিচালনা সমিতিৰ লগতো এক আলোচনাত মিলিত হয় । ইয়াৰ পূৰ্বে সত্ৰ চৌহদত প্ৰৱেশ কৰিয়েই মুখ্যমন্ত্ৰীয়ে মঠৰ চোতালত সেৱা জনায় । বৰপেটা সত্ৰৰ ডেকা সত্ৰীয়া গৌতম পাঠক আৰু বুঢ়া ভকত হেমেন বাপে মুখ্যমন্ত্ৰীক আশিস নিৰ্মালি প্ৰদান কৰে ।
