ধুবুৰী, ৪ জুন : অসমৰ প্ৰায়কেইটা লোকসভা সমষ্টিৰ নিৰ্বাচনৰ ফলাফল স্পষ্ট হৈ পৰিছে । অৱশ্যে ডিব্ৰুগড় লোকসভা সমষ্টিৰ বাদে আন সমষ্টিকেইটাৰ নিৰ্বাচনী ফলাফল নিৰ্বাচন আয়োগৰ তৰফৰ পৰা আনুষ্ঠানিকভাৱে ঘোষণা কৰিবলৈ বাকী ।
কিন্তু শেহতীয়া তথ্য মতে, ধুবুৰী লোকসভা সমষ্টিত কংগ্ৰেছ প্ৰাৰ্থী ৰকিবুল হুছেইন বৃহৎ ব্যৱধানত জয়লাভৰ দিশে আগবাঢ়িছে । এ আই ইউ ডি এফৰ মুৰব্বী বদৰুদ্দিন আজমলৰ ঘাটিত ছুনামি আনি ৰকিবুলে অভিলেখ সংখ্যক প্ৰায় ৫ লাখ ভোটৰ ব্যৱধানত জয়ৰ সম্ভাৱনা প্ৰকট হৈ পৰিছে । অৱশ্যে তেওঁৰ জয়ৰ আনুষ্ঠানিক ঘোষণা বাতৰি যুগুতোৱাৰ সময়লৈকে নিৰ্বাচন আয়োগে কৰা নাই । কিন্তু যিয়েই নহওক ৰকিবুল হুছেইনে ধুবুৰী লোকসভা সমষ্টিত জয়ৰ ৰেকৰ্ড সৃষ্টি কৰাটো এক প্ৰকাৰ খাটাং ।
ইফালে নিজৰ জয়ৰ সম্ভাৱনা উজ্জ্বল হৈ পৰা পিচতে বিলাসীপাৰা মহকুমাধিপতি কাৰ্যালয়ৰ ভোটগ্ৰহণ কেন্দ্ৰত উপস্থিত হয় কংগ্ৰেছ প্ৰাৰ্থী ৰকিবুল হুছেইন । আনহাতে, ৰেকৰ্ড সংখ্যক ভোটৰ ব্যবধানত জয় হোৱাটো নিশ্চিত হোৱাৰ পিচত বিলাসীপাৰাত কংগ্ৰেছী সমৰ্থকসকলে বিজয় উল্লাস কৰে ।
লগতে পঢ়ক :এগজিট প’ল নহয় মোদী প’লহে আছিল : গৌৰৱ গগৈ - LOK SABHA ELECTION RESULTS 2024
আনহাতে, ৰেকৰ্ড সংখ্যক ভোট প্ৰদানৰ বাবে ধুবুৰী লোকসভা সমষ্টিৰ সকলো ভোটাৰক ধন্যবাদ জনায় ৰকিবুল হুছেইনে । সংবাদ মাধ্যমৰ আগত নিজৰ প্ৰতিক্ৰিয়া প্ৰকাশ কৰি ৰকিবুল হুছেইনে কয় যে তেওঁক ধুবুৰীবাসীয়ে দিয়া মৰমৰ মূল্য তেওঁ দিব । ধুবুৰী সমষ্টিৰ লোকসকল খাতিখোৱা, কিন্তু তেওঁলোকৰ সন্মান আছে । সেই সন্মান তেওঁলোকক সময়ত দিব বুলিও ৰকিবুল হুছেইনে প্ৰকাশ কৰে ।
ৰকিবুল হুছেইনে লগতে প্ৰকাশ কৰে যে ধুবুৰী সমষ্টিৰ জাতি-ধৰ্ম নিৰ্বিশেষে সকলোৱে তেওঁক সমৰ্থন কৰাৰ বাবে তেওঁ কৃতজ্ঞ । ইয়াৰ বাবে তেওঁ সমষ্টিৰ প্ৰতিগৰাকী ভোটাৰক ধন্যবাদ জনায় । তেওঁক ভোট দিয়া বা নিদিয়া সকলোৰে বাবে আগন্তুক সময়ত কাম যোৱাৰো প্ৰতিশ্ৰুতি প্ৰদান কৰে । আনহাতে, নিৰ্বাচনৰ সময়ত দিয়া প্ৰতিশ্ৰুতি পূৰণ তেওঁৰ প্ৰথম অগ্ৰাধিকাৰ হ'ব বুলিও প্ৰকাশ কৰে ।
ইফালে বদৰুদ্দিন আজমলৰ পৰাজয় সন্দৰ্ভত সোধা প্ৰশ্নৰ উত্তৰত বুদ্ধিমত্তাৰে ৰকিবুল হুছেইনে কয় যে এয়া হৈছে ধুবুৰী সমষ্টিবাসীৰ সন্মানৰ জয় ।
লোকসভা নিৰ্বাচনৰ ফলাফলৰ অধিক বা-বাতৰিৰ বাবে ক্লিক কৰক :
https://www.etvbharat.com/en/!elections/election-2024