শিৱসাগৰ,১৮ এপ্ৰিল: লোকসভা নিৰ্বাচনক কেন্দ্ৰ কৰি গৰম হৈ পৰিছে ৰাজনৈতিক পৰিৱেশ । ইতিমধ্যে শুকুৰবাৰে অনুষ্ঠিত হ'বলগীয়া প্ৰথম পৰ্যায়ৰ ভোটগ্ৰহণৰ বাবে নিৰ্বাচনী প্ৰচাৰ সামৰি সাজু হৈছে প্ৰতিগৰাকী প্ৰাৰ্থী । ইয়াৰ মাজতে ৰাইজৰ দলৰ সভাপতি তথা বিধায়ক অখিল গগৈয়ে প্ৰকাশ কৰে এক বিশেষ তথ্য । একত্ৰিত হ'ব সৌ সিদিনা গঠিত অসমৰ দুই ৰাজনৈতিক দল অসম জাতীয় পৰিষদ আৰু ৰাইজৰ দল ।
শিৱসাগৰত বিধায়কগৰাকীয়ে সংবাদমেল সম্বোধন কৰি প্ৰকাশ কৰে এই তথ্য । ৰাইজৰ দলৰ সভাপতিগৰাকীয়ে সংবাদমেলযোগে কয় যে, দুয়োটা দলে লগ হৈ এটা নতুন আঞ্চলিক ৰাজনৈতিক দল তৈয়াৰ কৰাৰ চিন্তা-চৰ্চা কৰা হৈছে । এই সন্দৰ্ভত ইতিমধ্যে পঞ্চম ৰাউণ্ডৰ আলোচনা সম্পন্ন হৈছে আৰু বৰ্তমান শীৰ্ষ পৰ্যায়ৰ আলোচনা অব্যাহত আছে । লোকসভা নিৰ্বাচনৰ কেইটামান মাহৰ পিচতে দুয়োটা দল ঐক্যবদ্ধ হৈ এটা নতুন আঞ্চলিকতাবাদী শক্তি তৈয়াৰ কৰাৰ আশা প্ৰকাশ কৰে অখিল গগৈয়ে ।
লগতে তেওঁ কয় যে, এই নতুন আঞ্চলিকতাবাদী শক্তিয়ে অসমৰ ৰাইজতক ঐক্যবদ্ধ কৰাৰ প্ৰয়াস কৰিব । এই শক্তিয়ে ২০২৬ চনত বিজেপি বিৰোধী এক শক্তি সাজু কৰি, বিজেপিৰ বিকল্প চৰকাৰ গঠন কৰাৰ বাবে কাম কৰিব । পিছে বিধায়ক অখিল গগৈয়ে এইদৰে ঘোষণা কৰিলেও বৰ্তমানেও অসম জাতীয় পৰিষদৰ তৰফৰ পৰা কোনোধৰণ প্ৰতিক্ৰিয়া প্ৰকাশ কৰা পৰিলক্ষিত হোৱা নাই ।
আনহাতে অখিল গগৈয়ে অগপক চোকা সমালোচনাৰে থকাসৰকা কৰি কয় যে, অসম গণ পৰিষদৰ কাৰ্যতঃ মৃত্যু ঘটিছে । অগপ এতিয়া আৰু আঞ্চলিকতাবাদী শক্তি নহয় । অগপ বৰ্তমান বিজেপিৰ বহতীয়া সংগঠনৰ দৰে হ'ল বুলি কৈ তেওঁ অসম গণ পৰিষদ বিজেপিৰ বি টীমৰ বাদে আন একো নহয় বুলি তেওঁ উল্লেখ কৰে । গতিকে এনে সময়ত অসমত এটা নতুন আঞ্চলিক ৰাজনৈতিক শক্তিৰ প্ৰয়োজন হৈছে বুলি তেওঁ দাবী কৰে ।
লগতে তেওঁ কয় যে, এটা আঞ্চলিকতাবাদী শক্তিৰ গুৰুত্ব আৰু প্ৰয়োজনীয়তা অনুভৱ কৰি বিগত কেইবাদিনো ধৰি ৰাইজৰ দলত বহুসংখ্যক লোকে যোগদান কৰিছে । অগপৰ বহু কৰ্মকৰ্তাই ৰাইজৰ দলত যোগদান কৰিছে । কেবল অগপই নহয়, বিজেপি, কংগ্ৰেছ আদি বহুকেইটা দলৰ শতাধিক পুৰুষ-মহিলাই ৰাইজৰ দলত যোগদান কৰিছে । সকলোকে ৰাইজৰ দলৰ বাবে, দলটোৰ সাংগঠনিক কামকাজত মনোনিৱেশ কৰি আঞ্চলিকতাবাদী ভেটি মজবুত কৰিবৰ বাবে আহ্বান জনাই ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে ।
লগতে পঢ়ক: মুখ্যমন্ত্ৰীৰ পৰা ফোনকল ৰেকৰ্ড বিচাৰি অখিল গগৈৰ প্ৰত্যাহ্বান - Akhil Gogoi
