জোনাই : অসমৰ মাটি সাৰুৱা, সেয়া হয়তো দুনাই কোৱাৰ প্ৰয়োজন নাই ৷ এই সাৰুৱা মাটিত খেতি কৰিও যে স্বাৱলম্বিতাৰ বাট প্ৰশস্ত কৰি পাৰি তাৰেই প্ৰমাণ কৰি দেখুৱালে অসম-অৰুণাচল সীমান্তস্থিত জামপানী অঞ্চলৰ শতাধিক কৃষকে ৷
জামপানী হৈছে অসম-অৰুণাচল সীমান্তৰ চিয়াং নৈ পাৰৰ এখন সুন্দৰ ঠাই ৷ উৰ্বৰা জামপানীৰ শ শ হেক্টৰ মাটিত অসমৰ কৃষকে সেউজ বিপ্লৱৰ সূচনা কৰিছে ৷ অসম আৰু অৰুণাচল প্ৰদেশৰ প্ৰায় শতাধিক কৃষকে জামপানীৰ শ শ হেক্টৰ মাটিত আলু, সৰিয়হ, মাকৈ, তিল, কবি, বেঙেনা আদিৰ খেতি কৰি দেখুৱাইছে স্বাৱলম্বিতাৰ নিৰ্দশন ৷
বছৰ বছৰ ধৰি খৰালি আৰু বাৰিষা দুটা সময়তে নানা খেতি কৰি আহিছে জামপানীৰ খেতিয়কসকলে ৷ সম্পূৰ্ণ নিজা ধনেৰে খেতিয়কসকলে ব্যৱসায়িক ভিত্তিত খেতি কৰি উপাৰ্জনৰ এক বাট মুকলি কৰি আহিছে ৷ যিহেতু এই কৃষকসকল হৈছে অসম-অৰুণাচল সীমান্তৰ, সেয়ে অসম বা আৰুণাচলৰ কোনো এখন ৰাজ্য চৰকাৰৰ পৰা কোনো সহায় পোৱা নাই বুলি মন্তব্য কৰে কৃষকসকলে ৷
লগতে কৃষকসকলে নিজা গাঁঠিৰ ধনেৰে সূদূৰ পঞ্জাবৰ পৰা আলুৰ বীজ আানি খেতি কৰি আহিছে বুলিও মত প্ৰকাশ কৰে ৷ জামপানীত হোবা আলু খেতিয়ে অসমৰ ডিব্ৰুগড়, তিনিচুকীয়া, লখিমপুৰ, ধেমাজি, চিলাপথাৰ আদি ঠাইলৈ ৰপ্তানি হোবাৰ উপৰিও অৰুণাচলৰ পাচিঘাট, তেজু, ইটানগৰ, আলং, বাছাৰ আদি নানা ঠাইলৈ ৰপ্তানি কৰে ৷
লগতে পাপৰ আৰু তিলৰ ফচলসমূহ খাৰুপেটীয়াৰ বেপাৰীয়ে আহি লৈ যায় বুলি জানিব দিয়ে খেতিয়কসকলে ৷ নিজৰ গাঁঠিৰ ধন খৰচ কৰি খেতিয়কসকলে অতি কষ্টৰে উৎপাদন কৰাৰ পিছতো উচিত মূল্য লাভ নকৰাৰ বাবে কেতিয়াবা যথেষ্ট লোকচানৰ সন্মুখীন হ’ব লগা হয় বুলিও তেওঁলোকে কয় ৷
