মাজুলী : ‘‘শৰৎ কালৰ ৰাত্ৰি অতি বিতোপন । ৰাসক্ৰীড়া কৰিতে কৃষ্ণৰ ভৈল মন ।।’’ আজি ৰাস পূৰ্ণিমা ৷ শ্ৰীকৃষ্ণৰ ভক্তিৰসত গুঞ্জৰিছে সমগ্ৰ ৰাজ্য ৷ সচৰাচৰ ৰাস বুলি ক’লেই মাজুলীৰ ছবিখন মানসপটত জিলিকি উঠে ৷
কাতি মাহৰ লক্ষ্মী পূৰ্ণিমাৰ দিনাই সমগ্ৰ মাজুলীৰ ১২ খনকৈ সত্ৰৰ লগতে অৰ্ধশতাধিক মঞ্চত পৰম্পৰাগতভাৱে শ্ৰীকৃষ্ণৰ ৰাসলীলাৰ আখৰা তথা ‘‘নাট মেলা পৰ্ব’’ অনুষ্ঠিত কৰা হয় ৷ উক্ত দিনাৰ পৰাই মাজুলীত এমাহ ধৰি ৰাসৰ আখৰা আৰম্ভ হৈ আহিছে ।
মাজুলীৰ ১২ খনকৈ সত্ৰৰ লগতে অৰ্ধ শতাধিক ৰংগমঞ্চত এইবাৰ ৰাসলীলাৰ আয়োজন কৰা হৈছে । ইতিমধ্যে সাজু হৈ উঠিছে ৰাসমঞ্চসমূহ । শুকুৰবাৰ অৰ্থাৎ আজিৰে পৰা যদিও ৰাসৰ আৰম্ভণি হ’ব, কিন্তু ১৪ নৱেম্বৰ অৰ্থাৎ বৃহস্পতিবাৰৰ পৰাই উজনি আৰু নামনি মাজুলীৰ ৭ টা স্থানত অনুষ্ঠিত হয় এই ৰাসলীলা । বৃহস্পতিবাৰে নিশা মাজুলীৰ মূদৈবিল মিলনজ্যোতি ৰংগমঞ্চত আয়োজন কৰা হয় কংসালয় নাট ভাগ ৷
উল্লেখ্য যে, মাজুলী এতিয়া দ্বিতীয় বৃন্দাবনলৈ পৰিণত হৈছে । আনহাতে, আজি নিশাৰে পৰা অক, বক, কেশী, পুতনা, কংসক বধিবলৈ সাজু মাজুলীৰ শিল্পীসকলো ৷ মাজুলীৰ ৰাস উপভোগ কৰিবলৈ ইতিমধ্যে বহু দেশী-বিদেশী পৰ্যটকে এতিয়া ভিৰ কৰিছেহি । ৰাস দর্শনাৰ্থীসকলক আদৰিবলৈ সাজু হৈছে মাজুলীবাসীও ।
অসমৰ সত্ৰীয়া সংস্কৃতিৰ বৰঘৰ স্বৰূপ মাজুলীৰ কমাৰগাঁও ৰূপালী যুৱক সংঘই বৃহস্পতিবাৰে শেষ দিনৰ বাবে আখৰা কৰে । সংঘৰ সদস্যসকলে জনোৱা অনুসৰি, প্ৰথম দিনা ২০০ গচি বন্তি প্ৰজ্বলনেৰে তেওঁলোকে ৰাসৰ কাৰ্যসূচী আৰম্ভ কৰিব । মাজুলীৰ লগতে অসমৰ সকলো ৰাসপ্ৰেমী দৰ্শকক ৰাসৰ নাট উপভোগ কৰাৰ লগতে তেওঁলোকে সকলোৰে সহায় সহযোগিতা কামনা কৰিছে ।
