সৰুপথাৰ, ৩১ জুলাই: পেৰিছ অলিম্পিকৰ বক্সিং ৰিঙত নামিব অসম কন্য়া লাভলীনা বৰগোঁহাইয়ে । বুধবাৰে লাভলীনা বৰগোঁহাইৰ বিজয় কামনাৰে ঐতিহ্যমণ্ডিত বৰপথাৰৰ দুৱৰণি শিৱমন্দিৰত আশিস বিচাৰিলে স্থানীয় ৰাইজে । লাভলীনা বৰগোঁহাইৰ হৈ পৱিত্ৰ শাওন মাহত আজি বৰপথাৰৰ স্থানীয় ৰাইজ তথা ভাৰতীয় জনতা যুৱ মৰ্চাৰ বিষয়ববীয়াই আশীৰ্বাদ বিচাৰি আৰাধনা কৰে । কোনোৱে যদি ধূপ-চাকি, ফুল-বেলপাতেৰে কৰিছে আৰাধনা, কোনোৱে আকৌ শৰাই আগবঢ়াইছে ।
লাভলীনাই সোণৰ পদক কঢ়িয়াই আনক তাকে লৈ আশিস বিচাৰি দুৱৰণিৰ শিৱ মন্দিৰত পূজা-অৰ্চনা কৰিছে । উল্লখযোগ্য যে লাভলীনাই পেৰিছত শাওন মাহৰ বাবেই নিৰামিষ আহাৰ গ্ৰহণ কৰি আছে । শাওন মাহ শিৱৰ মাহ বুলি জনা যায় । শিৱৰ আৰাধনাৰে মুখৰিত হয় মঠ-মন্দিৰসমূহ । বুধবাৰে বৰপথাৰৰ দুৱৰণি শিৱ মন্দিৰতো একেই দৃশ্য ।
আজি বক্সিং ৰিঙত লাভলীনা :
পেৰিছ অলিম্পিকৰ ৭৫ কেজি মহিলা শাখাৰ বক্সিং ৰিঙত আজি অৱতীৰ্ণ হ'ব অসম কন্যা লাভলীনা বৰগোহাঁই । বিয়লি ৩.৫০ বজাত ন'ৰৱেৰ বক্সাৰ ছুন্নিভা হফষ্টেডৰ বিৰুদ্ধে খেলিব প্ৰথমখন খেল, যাক লৈ ৰাজ্যৰখনৰ লগতে গৃহ চহৰত আনন্দৰ বন্যা বৈছে । সৰুপথাৰতো শুভেচ্ছামূলক অনুষ্ঠান 'গ' ফ'ৰ গ'ল্ড লাভলীনা' বাক্যৰে শুভেচ্ছা প্ৰদান কৰিছে ।
আদৰ্শ হিন্দী হাইস্কুল খেলপথাৰৰ পৰা যাত্ৰা :
বৰপথাৰৰ আদৰ্শ হিন্দী হাইস্কুলৰ প্ৰাংগন খেলপথাৰৰ পৰাই বক্সিঙৰ যাত্ৰা আৰম্ভ হৈছিল লাভলীনাৰ । টকিঅ' অলিম্পিকত ব্ৰঞ্জৰ পদক বিজয়ৰ পিছত দ্বিতীয়বাৰৰ বাবে পেৰিছ অলিম্পিকত অংশ ল'ব লাভলীনাই । এইবাৰৰ অলিম্পিক গেমছত অসমৰ একমাত্ৰ খেলুৱৈ হিচাপে অংশ লৈছে লাভলীনা বৰগোহাঁয়ে । মহিলাৰ ৭৫ কেজি শাখাত অংশ ল'ব অসম কন্যা লাভলীনা বৰগোহাঁয়ে ।
