তিনিচুকীয়া, ১৬ জুন : তিনিচুকীয়া জিলাৰ ডুমডুমা ৰাজহ চক্ৰৰ অন্তৰ্গত পশ্চিম ছৈখোৱা ফেলাই নাওঁকটাত প্ৰৱল ৰূপত ব্ৰহ্মপুত্ৰই সৃষ্টি কৰি আহিছে খহনীয়াৰ ৷ ৰজাঘৰৰ ওচৰত ৰাইজে বাৰম্বাৰ আহ্বান জনোৱাৰ পাছতো কোনো সুফল লাভ কৰা নাই ৰাইজে ৷ সেয়েহে হেৰুৱাব লগা হৈছে বিঘাই বিঘাই মাটি-বাৰী ৷
শেহতীয়াকৈ জলসম্পদ বিভাগে এই খহনীয়া প্ৰতিৰোধ কৰিবলৈ জিঅ’বেগ গৰাত দি ব্ৰহ্মপুত্ৰৰ খহনীয়া ৰোধ কৰিবলৈ চেষ্টা অব্যাহত ৰাখিছে যদিও সেয়া সম্ভৱ হৈ উঠা নাই ৷ সেয়েহে শনিবাৰে খহনীয়া প্ৰতিৰোধ কৰিবলৈ ওলাই আহিল ক্ষুব্ধ ৰাইজ ।
এইবাৰ জলসম্পদ বিভাগে কৰিব নোৱৰা কাম কৰিবলৈ চেষ্টা কৰিছে স্থানীয় ভুক্তভোগী ৰাইজে ৷ এই স্থানত ব্ৰহ্মপুত্ৰই খহনীয়া সৃষ্টি কৰি নদীৰ সুঁতি কাষচাপি গৈ থকাৰ বিপৰীতে মাজভাগত প্ৰকাণ্ড বালিচৰৰ সৃষ্টি হৈছে ৷ এই বালিচৰ খান্দি সুঁতি সৃষ্টি কৰাৰ ব্যৱস্থা কৰিবলৈ জলসম্পদ মন্ত্ৰী পীযুষ হাজৰীকাক ৰাইজে আহ্বান জনাইছিল যদিও তাৰ ব্যৱস্থা নাই বুলি মন্তব্য কৰাত ৰাইজে শনিবাৰে শ্ৰমদান কৰি খান্ধিলে এটি নলা বা সুঁতি ৷
যি সুঁতিৰে এতিয়া কিছু পৰিমাণে বৈ গৈছে পানী ৷ বিয়াগোম জলসম্পদ বিভাগে কৰিব নোৱৰা কাম কৰি দেখুৱালে ৰাইজে ৷ ৰাইজে কালি ব্ৰহ্মপুত্ৰৰ বুকুত পূজা-অৰ্চনা কৰি গাখীৰ ঢালি খনন কাৰ্য আৰম্ভ কৰে ৷ প্ৰায় ২০০ মিটাৰ দীঘল,২০ মিটাৰ বহল আৰু ২ ফুট গভীৰকৈ খান্দি ব্ৰহ্মপুত্ৰৰ পানী বৈ যাব পৰা ব্যৱস্থা কৰি ৰাইজে শ্ৰমদান সমাপ্ত কৰে ৷
ৰাইজৰ এই প্ৰচেষ্টা বৰ্তমান যথেষ্ট সফল হৈছে যদিও খহনীয়া ৰোধ কৰাত কিমান সফল হ'ব সেয়া সময়েহে ক'ব ।
