লখিমপুৰ,৩০ আগষ্ট: লখিমপুৰত অহা সাত দিনৰ ভিতৰত সকলো ফলক, বেনাৰত থাকিব লাগিব অসমীয়া ভাষা । সাত দিনৰ ভিতৰত সকলো বেনাৰ, ফলক অসমীয়া ভাষাত লিখা নহ'লে ব্যৱস্থা গ্রহণ কৰিব অসমীয়া যুৱ মঞ্চই । সাতদিনৰ পাছত অসমীয়াৰ বাহিৰে আন ভাষাত থকা সকলো বেনাৰ-ফলকত ক'লা ৰং সানিব অসমীয়া যুৱ মঞ্চই । লখিমপুৰত শুকুৰবাৰে এই হুংকাৰ দিয়ে অসমীয়া যুৱ মঞ্চই ।
শুকুৰবাৰে বিয়লি উত্তৰ লখিমপুৰ সাহিত্য সভা ভৱনৰ সন্মুখত অসমীয়া যুৱ মঞ্চৰ লখিমপুৰ জিলা সমিতিৰ বিষয়ববীয়াসকলে এই লৈ সাব্যস্ত কৰে তীব্ৰ প্ৰতিবাদ । প্ৰতিবাদত অংশগ্রহণ কৰি অসমীয়া যুৱ মঞ্চৰ কেন্দ্রীয় সমিতিৰ সম্পাদক অনুপম শইকীয়াই কয়, "অসমীয়া চৰকাৰী ভাষা আইন ১৯৬০ চনতে প্ৰয়োগ হৈছিল । কিন্তু আজি পৰ্যন্ত সঠিকভাৱে বাস্তৱায়িত নহ'ল সেই আইন । বিভিন্ন ব্যৱসায়িক প্ৰতিষ্ঠানকে ধৰি বহু অনুষ্ঠান আদিৰ নাম ফলক আজিও লিখা হোৱা নাই অসমীয়া ভাষাত । সেয়ে লখিমপুৰত অনাগত সাতদিনৰ ভিতৰত সকলো বেনাৰ, ফলকত অসমীয়া ভাষা ব্যৱহাৰ কৰিবলৈ দাবী জনালো । এই দাবী সম্বলিত স্মাৰকপত্ৰ জিলা আয়ুক্ত, পৌৰপতি আদিক প্ৰদান কৰা হৈছে ।"
তেওঁ লগতে কয়,"যদিহে সাতদিনৰ ভিতৰত কোনো ব্যবস্থা গ্রহণ কৰা নহয়, নাইবা বেনাৰ-ফলক অসমীয়া ভাষাত লিখা নহয়, তেন্তে অসমীয়া যুৱ মঞ্চই হাতে কামে লাগি অসমীয়াৰ বাহিৰে আন ভাষাত লিখা বেনাৰ-ফলকসমূহত ক'লা ৰং সানিব ।" অসমীয়া যুৱ মঞ্চৰ এনে হুংকাৰৰ পাছত পৰৱৰ্তী কেনে পৰিস্থিতি সৃষ্টি হয় সেয়া লক্ষ্যণীয় হ'ব ।
