কলিয়াবৰ, ১ আগষ্ট : কৃষিভূমি, চাহ বাগিচা ধ্বংস কৰাৰ ষড়যন্ত্ৰৰ অভিযোগত আট্ছাই সাব্যস্ত কৰিছে তীব্ৰ প্ৰতিবাদ । বুধবাৰে ৰঙাজানত আৰক্ষীৰ লগত আটছাৰ বাক-বিতণ্ডা সৃষ্টি হোৱাৰ লগতে আৰক্ষীয়ে আটছাৰ কেবাগৰাকী নেতাক প্ৰহাৰ কৰিছিল । সেই ঘটনাৰ পিচতে কলিয়াবৰত তীব্ৰ প্ৰতিবাদী কাৰ্যসূচী ৰূপায়ণ কৰে কলিয়াবৰ আটছাই ।
উল্লেখযোগ্য যে, অসম চৰকাৰে কাজিৰঙাত যি পঞ্চতাৰকা হোটেল তাজ আৰু হায়াট নিৰ্মাণৰ যো-জা চলাই আছে, তাৰ বিৰুদ্ধে বিগত সময়ত চাহ শ্ৰমিকসকলৰ লগতে বিভিন্ন দল-সংগঠনে প্ৰতিবাদ সাব্যস্ত কৰি আহিছে ৷ বুধবাৰেও সদৌ অসম চাহ জনজাতি ছাত্ৰ সন্থাৰ উদ্যোগত এক প্ৰতিবাদী কাৰ্যসূচী হাতত লোৱা হৈছিল ।
বুধবাৰে প্ৰতিবাদকাৰী চাহ শ্ৰমিকৰ ওপৰত জঁপিয়াই পৰিছিল বোকাখাত আৰক্ষী ৷ আৰক্ষীৰ লাঠীৰ কোবত আহত হৈছিল কেবাগৰাকীও আটছা নেতাৰ লগতে বহুকেইগৰাকী চাহ শ্ৰমিক । বহুসময় ধৰি আৰক্ষী আৰু প্ৰতিবাদকাৰীৰ মাজত তীব্ৰ বাক-বিতণ্ডা চলি থাকে ৷ পথাৰত পৰি আৰু প্ৰতিবাদকাৰীৰে হতাহতিত কেবাজনো আৰক্ষীয়ে কিছু আঘাত পায় ৷
ইয়াৰ পিচতে বৃহস্পতিবাৰে কলিয়াবৰত সাব্যস্ত কৰা হয় প্ৰতিবাদ ৷ কলিয়াবৰ আটছাই অসম চৰকাৰৰ এই পদক্ষেপৰ বিৰুদ্ধে প্ৰতিবাদ সাব্যস্ত কৰি মুখ্যমন্ত্ৰী ড৹ হিমন্ত বিশ্ব শৰ্মাৰ পুত্তলিকা দাহ কৰে ৷ আটছা নেতা বিশ্বু তাঁতীয়ে কয়, ‘‘ মুখ্যমন্ত্ৰীয়ে একনায়কত্ববাদ চলাই আছে ৷ চাহগছ উচ্ছেদ কৰি বিলাসী হোটেল নিৰ্মাণৰ বাবে আগবাঢ়িছে ৷ চাহ শ্ৰমিকৰ উন্নতি কৰিম বুলি, মাটিৰ পট্টা দিম বুলি ঢাক-ঢোল বজাই আহিছিল; কিন্তু আজি বণিয়াগোষ্ঠীক শ-শ বিঘা মাটি দি আছে, কিন্তু চাহ শ্ৰমিকক এবিঘাও মাটি দিয়া নাই ৷ "
তেওঁ আৰু কয়, ‘‘ অসমত এক কোটিৰো বেছি চাহ জনগোষ্ঠীৰ লোক আছে ৷ সেই মানুহে ভোট দিয়াৰ পিচতে গাদীত বঢ়িছে ৷ শ্ৰমিকৰ ভোট পাইছে ৰজাঘৰীয়া গাদীত বহিছে ৷ যদি আমি বহাব পাৰিছো, উঠাই দিবও পাৰো ৷ অহা নিৰ্বাচনত আমি দেখুৱাই দিম, বাগিচাসমূহত বিজপিক বৰ্জন কৰিম ৷’’
লগতে পঢ়ক : কাজিৰঙাত উত্তপ্ত পৰিস্থিতি : আৰক্ষীৰ লাঠীচালনাত প্ৰতিবাদকাৰী আহত
লগতে পঢ়ক : ইংলে পথাৰৰ কৃষিভূমি অধিগ্রহণ নকৰিবলৈ সকীয়নি
লগতে পঢ়ক : বাতিল হ'ব নেকি কাজিৰঙাৰ বিশ্ব ঐতিহ্য ক্ষেত্ৰৰ স্বীকৃতি ?
