ডিমা হাচাও, ৭ জুন: উত্তৰ কাছাৰ পাৰ্বত্য স্বায়ত্ব শাসিত পৰিষদৰ নিযুক্তি প্ৰক্ৰিয়াত বিসংগতিক লৈ এইবাৰ সৰৱ হৈ উঠিছে ইণ্ডিজিনাচ ষ্টুডেণ্ট ফ’ৰামৰ লগতে ৯ টাকৈ স্থানীয় ছাত্ৰ সংগঠন । বৃহস্পতিবাৰে ফ’ৰামৰ হাফলংস্থিত কাৰ্যালয়ত সংবাদমেল সম্বোধন কৰি এই অভিযোগ উত্থাপন কৰে ছাত্ৰ সংগঠনটোৱে ৷
সংগঠনটোৱে দাবী কৰা অনুসৰি, উত্তৰ কাছাৰ পাৰ্বত্য স্বায়ত্ব শাসিত পৰিষদত নিযুক্তিৰ ক্ষেত্ৰত জিলাখনৰ এটা জনগোষ্ঠীৰ নিবনুৱাসকলকহে নিযুক্তি দিয়া হৈছে ৷
সংবাদমেলত অভিযোগ উত্থাপন সংগঠনটোৰ প্ৰতিনিধিসকলে কয়, ডিমা হাছাওত অন্যান্য জনগোষ্ঠীৰ শিক্ষিত নিবনুৱা প্ৰাৰ্থীসকলক বঞ্চিত কৰি এটা বিশেষ জনগোষ্ঠীৰ নিবনুৱা প্ৰাৰ্থীসকলক পিছ দুৱাৰেৰে বিভিন্ন পদত নিযুক্তি দিয়া হৈছে । যাৰ বাবে এই ৯ টা ছাত্ৰ সংগঠনে ক্ষোভ ব্যক্ত কৰি অনতিপলমে এই ধৰণৰ নিযুক্তি বন্ধ কৰাৰ দাবী উত্থাপন কৰে ৷ তদুপৰি বিষয়টোত কেন্দ্ৰ-ৰাজ্য চৰকাৰৰ হস্তক্ষেপ বিচাৰে ।
বিজেপি শাসিত উত্তৰ কাছাৰ পাৰ্বত্য স্বায়ত্ব শাসিত পৰিষদত এনে বিশেষ এটা জনগোষ্ঠীক নিযুক্তি দিয়া হ'লে ডিমা হাছাও জিলাত কেতিয়াও শান্তি ঘূৰি নাহিব । সংবাদমেলত ডেভিড কেভমে কয়, যাৰ শিক্ষাগত অৰ্হতা নাই, তেওঁলোককহে নিযুক্তি দিয়া হৈছে । অনতিপলমে এই নিযুক্তি প্ৰক্ৰিয়া বন্ধ কৰাৰ দাবী জনায় ছাত্ৰনেতাগৰাকীয়ে ।
তেওঁ ২০১০ চনত পূৰ্বৰ উত্তৰ কাছাৰ পাৰ্বত্য জিলাৰ নাম চৰকাৰীভাৱে সলনি কৰি ডিমা হাছাও কৰা হ'লেও, উত্তৰ কাছাৰ পাৰ্বত্য স্বায়ত্ব শাসিত পৰিষদৰ নাম চৰকাৰীভাৱে সলনি কৰা নহয় বুলি সদৰী কৰে । দেখা গৈছে উত্তৰ কাছাৰ পাৰ্বত্য স্বায়ত্ব শাসিত পৰিষদৰ প্ৰধান সচিবে(ট্ৰান্সফাৰ) যেতিয়া কোনো নিৰ্দেশনা বা কোনো চাৰ্টিফিকেট প্ৰদান কৰে, তাত লিখা থাকে উত্তৰ কাছাৰ পাৰ্বত্য স্বায়ত্ব শাসিত পৰিষদ হিচাপেহে ।
কিন্তু পৰিষদৰ প্ৰধান সচিবে(নৰ্মাল) যেতিয়া কোনো নিৰ্দেশনা বা পত্ৰ প্ৰদান কৰে, এই পত্ৰত লিখা হয় ডিমা হাছাও স্বায়ত্ব শাসিত পৰিষদ । এইবিষয়ে ডিমা হাছাওৰ ৰাইজৰ মাজতে বিভ্ৰান্তিৰ সৃষ্টি কৰিছে বুলি সংবাদমেলত মন্তব্য কৰে ডেভিড কেভমে ।
লগতে তেওঁ কয়, উত্তৰ কাছাৰ পাৰ্বত্য স্বায়ত্ব শাসিত পৰিষদ যেতিয়া কংগ্ৰেছৰ শাসনত আছিল, তেতিয়া এই পাহাৰীয়া জিলাৰ সংখ্যালঘু জনজাতি গোষ্ঠীৰ নিৰ্বাচিত জনপ্ৰতিনিধিক পৰিষদৰ কাৰ্যনিৰ্বাহ সমিতিত স্থান দিয়া হৈছিল ।
কিন্ত বিজেপি শাসিত পৰিষদৰ কাৰ্যনিৰ্বাহ সমিতিত এই সংখ্যালঘু জনগোষ্ঠীৰ নিৰ্বাচিত জনপ্ৰতিনিধিক পৰিষদৰ কাৰ্যনিৰ্বাহ সমিতিত স্থান দিয়া হোৱা নাই বুলি অভিযোগ উত্থাপন কৰে ডেভিড কেভমে । ডিমা হাছাওত বসবাস কৰা অন্যান্য জনগোষ্ঠীৰ লগতে যদি এনে আচৰণ অব্যাহত থাকে, তেনেহ’লে পৰৱৰ্তী সময়ত তেওঁলোকে আন্দোলনৰ পথ বাছি ল’ব ৷
