নিউজ ডেস্ক, 5 জুলাই : ৰাজস্থান চৰকাৰৰ ৰাজ্যিক নিৰ্বাচনী বিভাগে নিৰ্মাণ কৰা ‘পোষ্টেল বাডী’ কম্পিউটাৰ এপ্লিকেশ্যনটো অসমৰ আগন্তুক বিধানসভাৰ উপ-নিৰ্বাচনতো ব্যৱহাৰ কৰা হ’ব ৷ অসমৰ মুখ্য নিৰ্বাচনী বিষয়া অনুৰাগ গোৱেলে শুকুৰবাৰে ৰাজস্থানৰ ৰাজধানী জয়পুৰত এই কথা সদৰী কৰে ৷
উল্লেখ্য যে ৰাজস্থানৰ শ্ৰীগংগানগৰ জিলাত ‘পোষ্টেল বাডী’ নামৰ এপ্লিকেশ্যনটো প্ৰস্তুত কৰা হৈছিল ৷ এই এপৰ জৰিয়তে, নিৰ্বাচনৰ সময়ত অত্যাৱশ্যকীয় সেৱা, নিৰ্বাচনী কৰ্তব্যৰ উপৰিও আৰক্ষী, বৃদ্ধ-বিকলাংগ ভোটাৰসকলৰ বাবে ডাক বেলটৰ সুবিধা অধিক সুবিধাজনক আৰু সহজ কৰি তোলাৰ বাবে উদ্ভাৱন কৰা হৈছিল ৷ এপটো ২০২৪ চনৰ লোকসভা নিৰ্বাচনৰ সময়ত ৰাজস্থানৰ শ্ৰীগংগানগৰ জিলাত প্ৰস্তুত কৰা হৈছিল ৷ ৰাজস্থানৰ মুখ্য নিৰ্বাচনী বিষয়া নবীন মহাজনৰ উপস্থিতিত অসমৰ মুখ্য নিৰ্বাচনী বিষয়া গোৱেলে বিভাগীয় বিষয়াসকলৰ সৈতে এক বৈঠকত লোকসভা নিৰ্বাচন-২০২৪ আৰু তাৰ পূৰ্বে ৰাজ্যিক বিধানসভা নিৰ্বাচনৰ সময়ত ৰাজস্থানত কৰা তথ্য প্ৰযুক্তি (আইটি) আধাৰিত উদ্ভাৱনৰ বিষয়ে বিতংভাৱে আলোচনা কৰে ।
বৈঠকত মহাজনে কয় যে ‘পোষ্টেল বাডী’ এপ্লিকেশ্যনটো ব্যৱহাৰ কৰি ৰাজ্যখনৰ নিৰ্বাচনত ডাক বেলট ব্যৱহাৰ কৰা ভোটাৰসকলে, বিশেষকৈ আৰক্ষীৰ বৃহৎসংখ্যক লোকে ভোটদান কৰিবলৈ সক্ষম হয় ৷ ‘পোষ্টেল বাডী’ৱে নিৰ্বাচনী বিষয়াসকলৰ বাবে বিভিন্ন স্তৰত ডাক বেলটৰ ভোটদান প্ৰক্ৰিয়া অনুসৰণ কৰাটো সহজ কৰি তোলে ৷ আবেদনৰ পৰা ভোটদানলৈকে সকলো সহজ কৰি তোলে এই এপ্লিকেশ্যনটোৱে ৷
লগতে পঢ়ক: ৰাজ্যত ৫ বিধানসভা সমষ্টিৰ উপ-নিৰ্বাচন : টঙালি বান্ধি সাজু হ’ল বিজেপি
অসমৰ মুখ্য কাৰ্যবাহী বিষয়া গোৱেলে কয় যে কম্পিউটাৰ এপ্লিকেশ্যনটো ছেপ্টেম্বৰত অসমত অনুষ্ঠিত হ’বলগীয়া বিধানসভা উপ-নিৰ্বাচনত ব্যৱহাৰ কৰা হ’ব ৷ ইয়াৰ বাবে তেওঁ ৰাজস্থানৰ নিৰ্বাচন বিভাগৰ কাৰিকৰী বিশেষজ্ঞ-বিষয়াসকলক অসমলৈ প্ৰেৰণ কৰিবলৈও আহ্বান জনায় ৷ তেওঁ জানিবলৈ দিয়ে যে ভাৰতৰ নিৰ্বাচন আয়োগৰ উদ্যোগত তেওঁ ‘পোষ্টেল বাডী’কে ধৰি অন্যান্য তথ্য প্ৰযুক্তি উদ্ভাৱন অধ্যয়ন কৰিবলৈ ৰাজস্থানত উপস্থিত হয় ৷ অসমৰ মুখ্য নিৰ্বাচনী বিষয়াগৰাকীক সংগ দিয়ে অসম নিৰ্বাচন বিভাগৰ যুটীয়া মুখ্য নিৰ্বাচনী বিষয়া জিমলী ডেকা আৰু উপ-মুখ্য নিৰ্বাচনী বিষয়া গায়ত্ৰী শৰ্মাই ৷
গোৱেলে ৰাজস্থানৰ নিৰ্বাচন বিভাগৰ বিষয়াসকলৰ দ্বাৰা বিকশিত অন্যান্য কম্পিউটাৰ এপ্লিকেশ্যন ‘ইলেকচন বাডী' আৰু পোল ডে’ মেনেজমেণ্ট চিষ্টেমৰ বিষয়েও আলোচনা কৰে ৷ তেওঁ কয় যে এই সকলোবোৰ প্ৰযুক্তিগত পদক্ষেপে নিৰ্বাচন প্ৰক্ৰিয়াক অতি সৰল কৰি তুলিব ৷ নিৰ্বাচন আয়োগৰ দ্বাৰা আয়োজিত সকলো ৰাজ্যৰ মুখ্য নিৰ্বাচনী বিষয়া সন্মিলনত ৰাজস্থানৰ তদানীন্তন মুখ্য কাৰ্যবাহী বিষয়া প্ৰবীণ গুপ্তাই এই উদ্ভাৱনসমূহৰ লগতে ‘পোষ্টেল বাডী’এপ্লিকেশ্যনটো আন ৰাজ্যসমূহেও গ্ৰহণ কৰিবলৈ আহ্বান জনায় ৷
ৰাজস্থান নিৰ্বাচন বিভাগৰ বিষয়াসকলে কয় যে আন ৰাজ্যৰ নিৰ্বাচন বিভাগৰ বিষয়াসকলেও 'ইলেকচন বাডী' আৰু পি ডি এম এছৰ দৰে উদ্ভাৱনৰ প্ৰতি আগ্ৰহী আৰু তেওঁলোকে নিজ নিজ ৰাজ্যত গ্ৰহণ কৰিবলৈ বিচাৰে ৷ উল্লেখ্য ৰাজস্থানৰ ৰাজ্যিক যুটীয়া মুখ্য নিৰ্বাচনী বিষয়া প্ৰতিভা পাৰেক, যুটীয়া মুখ্য নিৰ্বাচনী বিষয়া এম এম তিৱাৰী, উপ মুখ্য নিৰ্বাচনী বিষয়া সোমদত্ত দীক্ষিত, উপ-মুখ্য নিৰ্বাচনী বিষয়া মঞ্জু ৰাণী, ভাৰত চৰকাৰৰ ৰাষ্ট্ৰীয় তথ্য বিজ্ঞান কেন্দ্ৰৰ (এনআইচি) ৰাজ্যিক পৰ্যায়ৰ বিষয়া আৰু নিৰ্বাচন বিভাগৰ অন্যান্য বিষয়াৰ উপৰিও জিলা তথ্য আৰু বিজ্ঞান বিষয়া পৰমজিৎ সিং ডাক নগৰ জিলাত এই চফ্টৱেৰ প্ৰস্তুত কৰা কাৰিকৰী দলৰ অংশ আছিল ৷
লগতে পঢ়ক: অসমৰ উপ-নিৰ্বাচন : ৫টা সমষ্টিৰ ৩ টাতে নতুন সাংসদৰ পত্নী-পুত্ৰ হ'ব পাৰে প্ৰাৰ্থী !
