ধেমাজি, ২ছেপ্টেম্বৰ: ভাদ মাহত চাৰিওফালে পথাৰ সেউজীয়া হৈ পৰিছে ৷ আহাৰ-শাওণত কৃষকে পথাৰত হাড়ভঙা পৰিশ্ৰম কৰাৰ অন্তত কঠিয়া ৰুঁই পথাৰ সেউজীয়া কৰি কাতি-আঘোণত প্ৰাপ্তিৰ সপোন দেখে । ভাদ-আহিনত হেঁপাহৰ খেতিডৰা সজাল ধৰি গেঁৰ ধৰাৰ সময় সমাগত ৷ পিছে এই সময়তে ভাদমহীয়া ধাৰাবাহিক প্ৰচণ্ড ৰ’দে দহিছে খেতিপথাৰ ৷ বৰষুণৰ অভাৱত ধেমাজি জিলাৰ মাছখোৱা অঞ্চলৰ কৃষকৰ শালিতলীলৈ আহিছে অশনি সংকেত ৷
পানী শুকাইছে পথাৰত :
ধেমাজিৰ মাছখোৱাৰ ক্ৰমে বেঙেনাগৰা,দেওঘৰীয়া,বৰাজান, ধিপগুৰি,বৰপাক,ফাতিয়া,কাইটং,মাছখোৱা আদি বহুতো অঞ্চলৰ পথাৰত পানী শুকাই ঘাহ-বন ওলাইছে ৷ কৃষকে নিজৰ খেতিডৰালৈ আৰু আকাশলৈ চাই স্বগতোক্তি কৰিছে-কি হ’ব ! আঘোণত ভঁৰাল নভৰিব নেকি ?
বিগত কিছুদিন ধৰি একেৰাহে প্ৰচণ্ড ৰ’দ দিয়াৰ ফলত পথাৰত ঠায়ে ঠায়ে মেলিছে চিৰাল ফাঁট । সেউজীয়া সজাল ধৰা পথাৰ ঠায়ে ঠায়ে হৈছে ৰঙচুৱা ৷ দেখাত পথাৰখন সেউজীয়া হৈ আছে যদিও মাটিত পানীৰ অভাৱত শ্ৰীবৃদ্ধি হ’ব পৰা নাই ধানৰ গা-গছ ৷ ফলত কাতি-আঘোণত ধানৰ উৎপাদন নোহোৱাত চিন্তিত হৈ পৰিছে কৃষক ৷
জলসিঞ্চন আঁচনিখনৰ পৰাও নাপাই পানী:
উল্লেখ্য় যে লাইপুলীয়া বোৱতী নদীৰ পৰা পানী তুলি খেতি পথাৰত দিয়া বৃহৎ জলসিঞ্চন ব্যৱস্থা আছে যদিও এই আঁচনিখনৰ পৰা অঞ্চলবাসীয়ে খেতিপথাৰত নাপাই এটোপালো পানী ৷ চৰকাৰৰ এই বৃহৎ জলসিঞ্চন আঁচনিখন ভালুকৰ সাঙীলৈ পৰিণত হোৱাৰ লগতে বিভাগটো ধনসিঞ্চনলৈ পৰ্যবসিত হৈছে বুলি ক্ষোভ প্ৰকাশ কৰিছে কৃষকে ।
এই আঁচনি স্থাপনৰ পিছত উক্ত অঞ্চলটোৰ কৃষক ৰাইজে তেওঁলোকৰ পথাৰত পানী যোগান নিয়মীয়া হ'ব বুলি আশা কৰিছিল । কিন্তু জলসিঞ্চন আঁচনি নিৰ্মাণৰ কেইবাবছৰ পিছতো কৃষকে আঁচনিখনৰ পৰা লাভ নকৰিলে পানী । যাৰ বাবে এতিয়াও বৰষুণৰ পানীৰ ওপৰত নিৰ্ভৰ কৰি খেতি কৰিবলগীয়া হৈছে কৃষকসকলে ।
