বিশ্বনাথ/তেজপুৰ: উপ-নিৰ্বাচনৰ ভোটগ্ৰহণলৈ মাজত মাত্ৰ কেইটামান ঘন্টাহে বাকী । তেনে সময়তে চলিল আৰক্ষীৰ এক বিশেষ অভিযান ৷ বিহালী সমষ্টিৰ কংগ্ৰেছ প্ৰাৰ্থী জয়ন্ত বৰাৰ মালিকানাধীন দুখনকৈ হোটেলত আৰক্ষী আৰু অৰ্ধসামৰিক বাহিনীয়ে মঙলবাৰে নিশা চলালে দীৰ্ঘসময়জুৰি তালাচী অভিযান ৷
বিশ্বনাথ চাৰিআলিত অৱস্থিত হোটেল ৰয়েল পেলেচ আৰু হোটেল ৰয়েল আবাসত হঠাতে মঙলবাৰে নিশা দলে-বলে আহি উপস্থিত হয় বিশ্বনাথ আৰক্ষী আৰু অৰ্ধ সামৰিক বাহিনী ৷ বিশ্বনাথৰ জিলা অতিৰিক্ত আয়ুক্তৰ উপস্থিতিত কেবা ঘণ্টাজুৰি দুয়োখন হোটেলতে চলোৱা হয় এই অভিযান ।
আৰক্ষী সুত্ৰই প্ৰকাশ কৰা অনুসৰি কংগ্ৰেছ প্ৰাৰ্থী জয়ন্ত বৰাই নিৰ্বাচনী আচৰণ বিধি ভংগ কৰাৰ এক অভিযোগ লাভ কৰাৰ বাবেই এই অভিযান চলোৱা হৈছে ৷ নিজৰ মালিকানাধীন দুয়োখন হোটেলত কংগ্ৰেছৰ নেতা-কৰ্মীসকলক ৰাখি ভোটাৰ ৰাইজক আকৰ্ষণ কৰিবলৈ ধনৰ লেন দেন কৰাৰ সন্দেহত এই অভিযান চলোৱা বুলি প্ৰকাশ কৰে আৰক্ষীয়ে ।
আনহাতে, কংগ্ৰেছ প্ৰাৰ্থী জয়ন্ত বৰাৰ সৈতে যোগাযোগ কৰিবলৈ চেষ্টা কৰা হৈছে যদিও বাতৰি লেখা সময়লৈকে কোনো যোগাযোগ হোৱা নাই । ই টিভি ভাৰতে প্ৰাৰ্থী জয়ন্ত বৰাক ফোন যোগে সবিস্তাৰে এই বিষয়ে জানিবলৈ চেষ্টা কৰে যদিও তেওঁ ফোন গ্ৰহণ কৰাৰ পৰা বিৰত থাকে । মন কৰিবলগীয়া যে সোমবাৰেও বিহালীৰ কংগ্ৰেছ প্ৰাৰ্থী জয়ন্ত বৰাৰ মালিকানাধীন চাহ বাগিচাৰ কাৰখানাতো আৰক্ষীয়ে অভিযান চলাইছিল ।
তাৎপৰ্যপূৰ্ণ যে সৌ সিদিনালৈকে বিজেপিত থাকি অৱশেষত টিকট বঞ্চিত হৈ নিশাটোৰ ভিতৰতে বিজেপি ত্যাগ কৰিছিল জয়ন্ত বৰাই ৷ আনকি কংগ্ৰেছত আনুষ্ঠানিকভাৱে যোগ নিদিয়াকৈয়ে কংগ্ৰেছ দলে তেওঁক আগবঢ়াইছিল বিহালীৰ প্ৰাৰ্থিত্ব ৷ যি ঘটনাত ক্ষুব্ধ হৈ অসম সন্মিলিত মঞ্চই কংগ্ৰেছক এঘৰীয়া কৰে আৰু বিৰোধী ঐক্যৰ সহায় অবিহনে কংগ্ৰেছে একক শক্তিৰেই নামিবলগীয়া হয় বিহালীৰ উপ-নিৰ্বাচনত ৷
