বঙাইগাঁও, 26 জুন: বুধবাৰে বিয়লি এক চাঞ্চল্যকৰ ঘটনাই জোকাৰি যায় সমগ্ৰ বঙাইগাঁও জিলাক ৷ বঙাইগাঁও চহৰৰ সমীপৰ চিপনশিলা অঞ্চলত দিন দুপৰতে এজন ব্যক্তিক গুলীয়াই হত্যা কৰা ঘটনাই সকলোকে আতংকিত কৰি তুলিছে ৷ মটৰ চাইকেলেৰে অহা দুই দুৰ্বৃত্তই নিচেই ওচৰৰ পৰা গুলীয়াই হত্যা কৰে চিপনশিলা গাঁও পঞ্চায়তৰ সচিব চন্দ্ৰকান্ত দাসক ৷ দুৰ্বৃত্তৰ গুলীয়ে চন্দ্ৰকান্ত দাসৰ মূৰত আঘাত কৰাত থিতাতে মৃত্যুক আঁকোৱালি লয় লোকজনে ৷
লগতে পঢ়ক: জোনাইত শোকাৱহ পথ দুৰ্ঘটনা, নিহত এগৰাকী কণমানি ছাত্ৰী - Road accident in Jonai
কেনেকৈ ঘটিছিল এই ঘটনা ?
তথ্য মতে, চিপনশিলাৰ এখন সৰু হোটেলত চাহ খাবলৈ সোমাইছিল চন্দ্ৰকান্ত দাস ৷ সেই সময়তেই হোটেলখনৰ সমুখত এখন বাইকেৰে আহি উপস্থিত হয় দুজন লোক ৷ এজন বাইকখনতে বহি থকাৰ বিপৰীতে হোটেলৰ ভিতৰত প্ৰৱেশ কৰে আনজনে ৷ চন্দ্ৰকান্ত দাসে চাহ খাই হোটেলৰ পৰা ওলাই অহাৰ সময়তে নিচেই ওচৰৰ পৰা লোকজনে চন্দ্ৰকান্ত দাসৰ মূৰত গুলী কৰে ৷ গুলীচালনাৰ পিচতেই বন্দুকধাৰীজনে ৰখাই থোৱা বাইকখনত উঠে আৰু দুয়োটা দুৰ্বৃত্তই সেই স্থানৰ পৰা পলায়ন কৰে ৷
ঘটনাস্থলীত উপস্থিত জিলা আয়ুক্ত আৰু আৰক্ষী অধীক্ষক
দিন-দুপৰতে পঞ্চায়ত সচিবজনক গুলীয়াই হত্যা কৰাৰ পিচতেই অঞ্চলটোত হুৱাদুৱা লাগে ৷ লগে লগে ঘটনাস্থলীত উপস্থিত হয় আৰক্ষী আয়ুক্ত মোহন লাল মীনা আৰু জিলা আয়ুক্ত নৱদ্বীপ পাঠক ৷ ইতিমধ্যে এই ঘটনা সন্দৰ্ভত আৰক্ষীয়ে তদন্ত আৰম্ভ কৰিছে ৷ বঙাইগাঁও জিলালৈ প্ৰৱেশ কৰা প্ৰতিটো পথত তালাচী অভিযান কটকটীয়া কৰি তুলিছে ৷ কোনো কাৰণতে যাতে হত্যাকাৰীয়ে পলায়ন কৰিব নোৱাৰে তাৰ প্ৰতি চোকা দৃষ্টি ৰাখিছে আৰক্ষীয়ে ৷
