মৰাণ, ১৮ জুলাই : গুৰুতৰভাৱে অসুস্থ হৈছে প্ৰদ্মশ্ৰী হেমপ্ৰভা চুতীয়া । অসুস্থতাৰ বাবে চিকিৎসালয়ত ভৰ্তি হ'বলগা হৈছে অসম গৌৰৱ হেমপ্ৰভা চুতীয়া ।
পোনতে তেওঁক মৰাণৰ এখন চিকিৎসালয়ত ভৰ্তি কৰোৱা হয় । জ্বৰ, মূৰৰ বিষ আৰু প্ৰস্ৰাৱৰ সমস্যাত কেইবা দিনৰ পৰা ভুগি আছিল তেওঁ । কিন্তু স্বাস্থ্যৰ অধিক অৱনতি ঘটাত বুধবাৰে নিশা মৰাণস্থিত মৰাণ মেডিকেল চেণ্টাৰত ভৰ্তি কৰোৱা হয় । মৰাণ মেডিকেল চেণ্টাৰত চিকিৎসকে চিকিৎসা কৰাৰ অন্তত কৰা পৰীক্ষাত তেওঁ কিছু সুস্থ অৱস্থালৈ আহে ।
অৱশ্যে যদিও তেওঁ সুস্থ অৱস্থালৈ আহিছে, কিন্তু মৰাণ মেডিকেল চেণ্টাৰৰ চিকিৎসকে প্ৰদ্মশ্ৰী হেমপ্ৰভা চুতীয়াক উন্নত চিকিৎসাৰ বাবে ডিব্ৰুগড়ৰ অসম চিকিৎসা মহাবিদ্যালয় হাস্পতাললৈ প্ৰেৰণ কৰে । আনহাতে, ৰাজ্য চৰকাৰৰ স্বাস্থ্য বিভাগৰ নিৰ্দেশত আৰু মৰাণ ৰাজহ চক্ৰ বিষয়াৰ তৎপৰতাত উন্নত চিকিৎসাৰ বাবে বুধবাৰে নিশাতেই তেওঁক ডিব্ৰুগড় অসম চিকিৎসা মহাবিদ্যালয়ত হাস্পতালত ভৰ্তি কৰোৱা হৈছে ।
উল্লেখ্য যে মৰাণৰ ফটিকাছোৱা অভয়পুৰীয়াৰ নিবাসী হস্ততাঁত শিল্পী হেমপ্ৰভা চুতীয়াই তাঁতশালত বস্ত্ৰ আকাৰে ইতিমধ্যে মহাপুৰুষ দুজনাৰ ধৰ্মগ্ৰন্থ গুণমালা, নামঘোষা আৰু শ্ৰীমদ্ভাগৱত গীতা ইত্যাদি ধৰ্মগ্ৰন্থ কেইবাটাও ভাষাত বৈ উলিয়াইছে । তাঁতশালত সৃষ্ট এই সম্পদসমূহৰ বাবেই হেমপ্ৰভা চুতীয়াই বিগত বৰ্ষত অসম গৌৰৱ বঁটা আৰু ভাৰত চৰকাৰৰ পদ্মশ্ৰী বঁটা লাভ কৰিবলৈ সক্ষম হৈছে ।
আনহাতে, শেহতীয়াকৈ মৰাণৰ কেইজনমান বিশিষ্ট ব্যক্তিৰ উদ্যোগত গঠন কৰা হয় হেমপ্ৰভা চুতীয়াৰ সৃষ্টিৰাজিৰ সংৰক্ষণৰ বাবে 'হেমপ্ৰভা চুতীয়া সৃষ্ট কলা-শিল্প সংৰক্ষণ ট্ৰাষ্ট' । এই ট্ৰাষ্টৰ উদ্যোগত মৰাণৰ ফটিকাছোৱা অভয়পুৰীয়াত হেমপ্ৰভা চুতীয়াৰ বাসগৃহৰ সমীপত এটা সংগ্ৰহালয় নিৰ্মাণৰ কাম হাতত লোৱা হৈছে । হেমপ্ৰভা চুতীয়াৰ তাঁতশালত সৃষ্ট সম্পদসমূহ ইয়াত সুৰক্ষিতভাৱে সংৰক্ষণৰ ব্যৱস্থা কৰা হ'ব ।
