ধিং,২৬ ছেপ্টেম্বৰ: মৰিগাঁও জিলা খাদ্য আৰু অসামৰিক যোগান বিভাগৰ সহকাৰী সঞ্চালক মতিনুৰ ৰহমানক কাৰ্যালয়ৰ ভিতৰতে চোকা অস্ত্ৰৰে আক্ৰমণ । মৰিগাঁও জিলা গঠন হোৱাৰ পিছত প্ৰথমবাৰৰ বাবে সংঘটিত হৈছে জিলা আয়ুক্তৰ কাৰ্যালয়ৰ ভিতৰত ছুৰিকাঘাতৰ দৰে জঘন্য ঘটনা । জিলা আয়ুক্তৰ কাৰ্যালয়ত অৱস্থিত খাদ্য আৰু অসামৰিক যোগান বিভাগৰ কাৰ্য্যালয়ত কৰ্তব্যৰত অৱস্থাত সহকাৰী সঞ্চালক মতিনুৰ ৰহমানক দুৰ্বৃত্তই আক্ৰমণ কৰি আহত কৰে ।
ছুৰিকাঘাতৰ ঘটনা সংঘটিত কৰা দুৰ্বৃত্তটো লাহৰীঘাটৰ খাইৰুল ইছলাম বুলি জানিব পৰা গৈছে । চৰকাৰী চাউল বক্ৰ পথেৰে বিক্ৰী কৰি অহাৰ অপৰাধত নগাবন্ধা সমবায় সমিতি লিমিটেড নামৰ সমবায়খনক নিলম্বন কৰিছিল সহকাৰী সঞ্চালক মতিনুৰ ৰহমানে । কেৱল এয়াই নহয়, নগাবন্ধা সমবায় সমিতিৰ বাবদ চৰকাৰে অনুদান দিয়া ৮৮ লাখ টকাৰ পৰা ৫৩ লাখ টকাৰ কেলেংকাৰী সংঘটিত হৈছিল বুলি ৰাইজে মৰিগাঁও জিলাৰ আয়ুক্ত হাতত লিখিত অভিযোগ দাখিল কৰিছিল ।
এইদৰে লাহৰীঘাট সমষ্টিৰ ৬ খন সমবায় সমিতিৰ বিৰুদ্ধে উখাপিত হোৱা অভিযোগৰ ভিত্তিত সহকাৰী সঞ্চালক মতিনুৰ ৰহমানে লাহৰীঘাট সমষ্টিৰ ৬ খন সমবায় সমিতিক নিলম্বন কৰিছিল । ইয়াতে ক্ষোভিত হৈ বৃহস্পতিবাৰৰ সন্ধিয়া খাইৰুল ইছলাম নামৰ দুৰ্বৃত্তটোৱে সহকাৰী সঞ্চালক মতিনুৰ ৰহমানক চোকা অস্ত্ৰৰে আক্ৰমণ কৰে । আক্ৰমণকাৰীটো নগাবন্ধা সমবায় সমিতিৰ সভাপতিৰ জোৱায়েক বুলি জানিব পৰা গৈছে । ইতিমধ্যে মৰিগাঁও আৰক্ষীয়ে দুৰ্বৃত্ত খাইৰুল ইছলামক আটক কৰি সোধাপোছা অব্যাহত ৰাখিছে । ইপিনে উক্ত ঘটনা সংঘটিত হোৱাৰ লগে লগে কাৰ্যালয়টোত এক হুৱা-দুৱা পৰিৱেশৰ সৃষ্টি হয় ।
