তিনিচুকীয়া, ৮ অক্টোবৰ: চৰকাৰ আহে, চৰকাৰ যায় যদিও শদিয়াবাসীৰ সমস্যা যেন সদায় সমস্যা হৈয়ে থাকে । শদিয়াবাসীৰ সমস্যা যেন সমাধান নহয় কোনোদিনেই । ৰাজ্য় চৰকাৰে বিভিন্ন আঁচনিৰে ঐতিহাসিক সম্পদৰ সংৰক্ষণৰ লগতে উন্নয়নত গুৰুত্ব প্ৰদান কৰা বুলি দাবী কৰি অহাৰ সময়তেই অৱহেলিত হৈ আছে ঐতিহাসিক স্বাক্ষৰ বহন কৰা এখন শাল ।
অভিযোগ অনুসৰি, তিনিচুকীয়া জিলাৰ শদিয়াৰ ঐতিহাসিক স্বাক্ষৰ বহন কৰা এনে কিছু মহত্ত্বপূৰ্ণ ধৰ্মীয় স্থান আছে যি স্থানসমূহ চৰকাৰৰ লগতে সংশ্লিষ্ট কৰ্তৃপক্ষৰ দৃষ্টি নপৰা বাবে আজিও যেন অৱহেলিত হৈ ৰৈছে ৷ শদিয়াৰ অৱহেলিত ধৰ্মীয় স্থানখনেই হৈছে বলিয়া বাবা শাল ।
শদিয়াৰ ঐতিহাসিক পৰিচয় বহন কৰা এক ধৰ্মীয় স্থান যাক শদিয়াৰ ৰাইজে শাল বুলি গণ্য কৰে আৰু এইখনেই হৈছে শদিয়াৰ চাৰিখন শালৰ ভিতৰত অন্যতম বলিয়া বাবা শাল । এই শালক কাৰাগাৰত বন্দী হৈ থকা লোকে স্মৰণ কৰিলে কাৰাগাৰৰ পৰা মুক্তি লাভ কৰিব পাৰে বুলি জনবিশ্বাস প্ৰচলিত হৈ আহিছে । দূৰদূৰণিৰ পৰা বহু লোকে স্মৰণ কৰি বিভিন্ন সমস্যাৰ সমাধানৰ পথ লাভ কৰি আহিছে । যাৰবাবে বছৰি দূৰ দূৰণিৰ পৰা বহু লোকৰ সমাগম হয় বলিয়া বাবা শালত ।
উল্লেখ্য যে শদিয়াবাসী ৰাইজে এই শালকেইখনলৈ পূজা আগ নবঢ়োৱাকৈ কোনো মাংগলিক কাম আৰম্ভ নকৰে । প্ৰতিগৰাকী লোকে নতুন বছৰত এই শাল সমূহত পূজা আগবঢ়ায় । ঐতিহাসিক শক্তিপীঠসমূহৰ অন্যতম স্থান শদিয়াত আজিও ৰাইজে গভীৰ আধ্যাত্মিক আস্থাৰে এই শাল সমূহত পূজা আগবঢ়ায় ৷ মুঠতে বছৰটোত এই শালসমূহত চাৰিবাৰ পূজা আগবঢ়ায় । কিন্তু তাৰ পাছতো বৰ্তমানৰ চৰকাৰখনে শদিয়াৰ দৰে এখন ঐতিহাসিক ঠাইত এই ধৰ্মীয় স্থানসমূহ আজিও সংৰক্ষণৰ ব্য়ৱস্থা কৰা নাই । ইয়াকে লৈ ৰাইজৰ মাজত ক্ষোভৰ সৃষ্টি হৈছে ।
ৰাইজে বহুবাৰ নিজ দান-বৰঙণিৰে শালখনৰ উন্নয়ন কৰিব চেষ্টা কৰিছে যদিও সেয়া পৰ্যাপ্ত নহয় । ৰাইজে কেইবাবাৰো স্থানীয় বিধায়ক বলিন চেতিয়াৰ লগতে মন্ত্ৰীক লগ কৰিছে যদিও শালখনৰ উন্নয়ন ফলপ্ৰসূ হোৱা নাই ।
