শিলচৰ, 13 আগষ্ট: ৰাজ্যত পুনৰ অন্তঃসত্ত্বা বোৱাৰীৰ ৰহস্যজনক মৃত্যু । স্বামী তথা পৰিয়ালৰ বিৰুদ্ধে উত্থাপন হৈছে হত্যাৰ অভিযোগ ৷ চাঞ্চল্যকৰ এই ঘটনাটো সংঘটিত হৈছে অসম-মিজোৰাম সীমান্তৰ কাছাৰৰ লায়লাপুৰ ফ্ৰেঞ্চনগৰত ৷ মৃত অন্তঃসত্ত্বা বোৱাৰীগৰাকী মিনাৰা বেগম বুলি জানিব পৰা গৈছে ।
জানিব পৰা মতে, বিগত শুকুৰবাৰৰ দিনা মিনাৰা বেগম নামৰ বোৱাৰীগৰাকীৰ ৰহস্যজনকভাৱে মৃত্যু ঘটে স্বামীগৃহত । এই খবৰ পাই পিতৃ পৰিয়ালৰ লোকসকল স্বামীগৃহত উপস্থিত হয় ৷ স্বামীৰ পৰিয়ালে মিনাৰাই আত্মহত্যা কৰিছে বুলি পিতৃগৃহৰ লোকক অৱগত কৰে যদিও এই কথা মানি ল’ব পৰা নাই মিনাৰাৰ পিতৃগৃহই । পিতৃগৃহৰ লোকসকলে মিনাৰাক হত্যা কৰা হৈছে বুলি সন্দেহ প্ৰকাশ কৰি সংশ্লিষ্ট আৰক্ষীক খবৰ দিয়ে ৷ আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে শিলচৰ মেডিকেল কলেজ হাস্পতাললৈ প্ৰেৰণ কৰে ।
মৃত বোৱাৰীগৰাকীৰ পৰিয়ালে জনোৱা অনুসৰি, এবছৰ পূৰ্বে মিনাৰা বেগমৰ বিবাহ হৈছিল লায়লাপুৰ ফ্ৰেঞ্চনগৰৰ ৰিয়াজুল আলীৰ সৈতে । বৰ্তমান বোৱাৰীগৰাকী 8 মাহৰ অন্তঃসত্ত্বা আছিল বুলিও জনায় পৰিয়ালৰ লোকে । বিবাহৰ পিছৰে পৰা মিনাৰা বেগমক স্বামী ৰিয়াজুলসহ শহুৰেকৰ ঘৰৰ লোকসকলে যৌতুকৰ দাবী দি শাৰীৰিক আৰু মানসিক নিৰ্যাতন চলাই আহিছিল বুলিও সংবাদ মাধ্যমৰ আগত জনায় পৰিয়ালৰ লোকে । এয়া লৈ পূৰ্বেও বহু বিচাৰসভা হৈছিল ।
যৌতুকৰ দাবী পূৰণ নকৰাৰ বাবেই 8 মাহৰ অন্তঃসত্ত্বা মিনাৰাক স্বামীসহ শহুৰেক পৰিয়ালৰ লোকসকলে পৰিকল্পিতভাৱে হত্যা কৰিছে বুলি অভিযোগ তোলে মৃত বোৱাৰীগৰাকীৰ পৰিয়ালৰ লোকসকলে । হত্যাৰ অভিযোগ তুলি স্বামী ৰিয়াজুল আলীসহ মুঠ ছয়জনৰ বিৰুদ্ধে মৃত বোৱাৰীগৰাকীৰ মাতৃয়ে লায়লাপুৰ আৰক্ষী চকীত এক গোচৰ ৰুজু কৰিছে বুলি জানিব পৰা গৈছে ।
