নগাঁও,২১ জুন: নগাঁও জিলা প্ৰশাসনৰ সহযোগত আৰু ৰাষ্ট্ৰীয় আয়ুষ মিছনৰ উদ্যোগত শুকুৰবাৰে দশম আন্তৰ্জাতিক যোগ দিৱসটি নগাঁও পুলিচ ৰিজাৰ্ভৰ সামূহিক ভৱনত উদযাপন কৰা হয় । জাতীয় সংগীতেৰে আৰম্ভ কৰা উক্ত অনুষ্ঠানটি বন্তি প্ৰজ্জ্বলনেৰে শুভাৰম্ভনি কৰে জিলা আয়ুক্ত নৰেন্দ্ৰ কুমাৰ শ্বাহে । যোগ দিৱসৰ শুভাৰম্ভ কৰি জিলা আয়ুক্তগৰাকীয়ে দিয়া আদৰণি ভাষণত বিশ্বৰ সমগ্ৰ মানৱ জাতিৰ শৰীৰ আৰু মনৰ উৎকৰ্ষ সাধন কৰাই আন্তঃৰাষ্ট্ৰীয় যোগ দিৱসৰ উদ্দেশ্য বুলি উল্লেখ কৰে ।
সুস্বাস্থ্য থাকিলেহে মন সুস্থ হৈ থাকিব আৰু মন সুস্থ হৈ থাকিলেহে সমাজখন সুস্থ হৈ থাকিব বুলিও ভাষণত উল্লেখ কৰে জিলা আয়ুক্তগৰাকীয়ে । নগাঁৱত উদযাপন কৰা যোগ দিৱসত আমন্ত্ৰিত অতিথি হিচাপে অংশগ্ৰহণ কৰে নগাঁও-বটদ্ৰৱা বিধানসভা সমষ্টিৰ বিধায়ক ৰূপক শৰ্মাই । যোগ দিৱসৰ কাৰ্যসূচীত অংশগ্ৰহণ কৰি দিয়া ভাষণত শাৰীৰিক ব্যায়াম, যোগাসন বা যোগভ্যাসৰ জৰিয়তে শাৰীৰিক আৰু মানসিকভাৱে সুস্থ হৈ থাকিব পৰা যায় বুলি উল্লেখ কৰে বিধায়ক ৰূপক শৰ্মাই ।
আনকি যোগৰ জৰিয়তে সুদীৰ্ঘ কাল মন মগজু সজীৱ কৰি ৰাখি শান্তিৰে উশাহ লৈ থাকিব পৰা যায় বুলিও উল্লেখ কৰে বিধায়কগৰাকীয়ে । যোগ অভ্যাসক দৈনন্দিন জীৱনৰ অংগ হিচাপে ল'বলৈ বিধায়কগৰাকীয়ে নৱ প্ৰজন্মক আহ্বান জনায় । ইয়াৰ পিচতে উপস্থিত সকলোকে যোগাভ্যাস কৰায় নগাঁও, নিৰ্বাণ যোগ কেন্দ্ৰৰ যোগৰ প্ৰশিক্ষক প্ৰভাত বৰা আৰু তেওঁৰ কেন্দ্ৰৰ যোগৰ প্ৰশিক্ষাৰ্থীসকলে । এই অনুষ্ঠানতে আন্তঃৰাষ্ট্ৰীয় যোগ দিৱসৰ উপলক্ষে যোৱা ১৫ জুনত আয়োজিত হোৱা যোগাসন প্ৰতিযোগিতাত স্থানপ্ৰাপ্ত প্ৰতিযোগীসকলক পুৰষ্কাৰ প্ৰদান কৰা হয় । এইবাৰ দশম আন্তৰ্জাতিক যোগ দিৱসৰ মূল থিম হৈছে নিজৰ আৰু সমাজৰ বাবে যোগাসন ।
