গুৱাহাটী, 5 জুলাই: ৰাজ্যজুৰি প্ৰলয়ংকাৰী বানৰ সংহাৰ অব্যাহত থকাৰ সময়তে মহানগৰীত সংঘটিত হ’ল এক শোকাৱহ ঘটনা ৷ মুষলধাৰ বৰষুণৰ মাজতে উন্মুক্ত নলাত উটি গ’ল এটি শিশু ৷ জ্যোতিনগৰত সংঘটিত হৈছে এই মৰ্মন্তুদ ঘটনাটো ৷
মহানগৰীৰ জ্যোতিনগৰৰ শনি মন্দিৰৰ সমীপত স্কুটীৰ পৰা পিচলি নলাত পৰি উটি যায় নুনমাটি ভৱানীপুৰৰ অবিনাশ সৰকাৰ নামৰ শিশুটি । পুৱতি নিশালৈ SDRF আৰু চানমাৰি আৰক্ষীয়ে অভিযান চলাই যদিও বাতৰি লিখাৰ পৰলৈকে আৰক্ষীয়ে কোনো সন্ধান উলিয়াব পৰা নাই শিশুটিৰ ।
কেনেকৈ সংঘটিত হ’ল দুৰ্ঘটনাটো
জানিব পৰা মতে, পিতৃৰ সৈতে স্কুটিত আহি থাকোতেই পিছলি পৰি সংঘটিত হয় এই শোকাৱহ ঘটনা । বৃহস্পতিবাৰে নিশা 11 মান বজাত পিতৃৰ সৈতে এখন স্কুটীত আহি আছিল শিশুটি । দোকানৰ পৰা পিতৃ আৰু আন এজন যুৱকৰ সৈতে এখন স্কুটাৰত আহি আছিল ঘৰ অভিমুখে আহি আছিল 8 বছৰীয়া শিশুটি ।
লগতে পঢ়ক: নেৰানেপেৰা বৰষুণ ফলত ৰাষ্ট্ৰীয় ঘাইপথত বাগৰি পৰিল প্ৰকাণ্ড গছ; ব্যাহত যাতায়ত ব্যৱস্থা
সেই সময়ত ধাৰাষাৰ বৰষুণ দি থকাৰ ফলত হঠাৎ স্কুটাৰখন পিছলি নলাত বাগৰি পৰে আৰু স্কুটাৰখনৰ মাজত বহি অহা শিশুটি নলাত পৰি যায় । নলাৰ তীব্ৰ সোঁতে চকুৰ পলকতে উটুৱাই লৈ যায় শিশুটিক । সন্তানক উদ্ধাৰ কৰিবলৈ দেউতাকে নলাত জাপ দিছিল, যদিও সন্তানক উদ্ধাৰ কৰিবলৈ সক্ষম নহ’ল ।
ততাতৈয়াকৈ ঘটনা সন্দৰ্ভত চান্দমাৰী থানাত দেউতাকে অৱগত কৰে । ঘটনাক কেন্দ্ৰ কৰি সমগ্ৰ অঞ্চলজুৰি এতিয়া চাঞ্চল্যই বিৰাজ কৰিছে ।
