বৰপেটাৰোড, 1 জুলাই : "সৰভোগৰ বৰনগৰ অঞ্চলৰ শৈক্ষিক পৰিবেশ পূৰ্বতকৈ বহু উন্নত হৈছে ৷ তাৰ বাবে শিক্ষাগুৰু আৰু অভিভাৱকসকললৈ মোৰ ফালৰ পৰা ধন্যবাদ জ্ঞাপন কৰিছো ৷ সমান্তৰালকৈ ছাত্ৰ-ছাত্ৰীসকলকো শুভেচ্ছা জ্ঞাপন কৰিছো ৷"- সৰভোগত উপস্থিত হৈ এই মন্তব্য আগবঢ়ায় মন্ত্ৰী ৰণজিৎ কুমাৰ দাসে ।
ভাৰতীয় জনতা পাৰ্টীৰ চকচকা মণ্ডল সমিতিৰ উদ্যোগত সৰভোগ অঞ্চলৰ পৰা এই বৰ্ষত মেট্ৰিক আৰু হায়াৰ ছেকেণ্ডাৰী পৰীক্ষাত প্ৰায় 50 জন ছাত্ৰ-ছাত্ৰীয়ে ডিষ্ট্ৰিংচনসহ সুখ্যাতিৰে উত্তীৰ্ণ হোৱাৰ লগতে 3 গৰাকী ছাত্ৰ-ছাত্ৰীয়ে নীট পৰীক্ষা আৰু এগৰাকীয়ে এপিএছচি পৰীক্ষাত উত্তীৰ্ণ হৈ অঞ্চলটোলৈ গৌৰৱ কঢ়িয়াই আনিছে ৷ কৃতি ছাত্ৰ-ছাত্ৰীকে সম্বৰ্ধনা জনাবলৈ দেওবাৰে আয়োজন কৰা হয় এখন সম্বৰ্ধনা সভাৰ ৷ এই সভাত মুখ্য অতিথি হিচাপে অংশগ্ৰহণ কৰে মন্ত্ৰী ৰণজিৎ কুমাৰ দাসে ৷
লগতে পঢ়ক: যোগেন মহনৰ উপস্থিতিত কৃতী শিক্ষাৰ্থী অভিনন্দন অনুষ্ঠান - Assam HS result 2024
অনুষ্ঠানৰ অন্তত সংবাদ মাধ্যমৰ সমুখত ৰাজ্যত সংঘটিত হোৱা মাৰ্কশ্বিট কেলেংকাৰীক বৃহৎ কেলেংকাৰী বুলি উল্লেখ কৰি মন্ত্ৰী ৰণজিৎ কুমাৰ দাসে কয়, "মুখ্যমন্ত্ৰী ড° হিমন্ত বিশ্ব শৰ্মা নেতৃত্বাধীন চৰকাৰখন শূন্য সহনশীল চৰকাৰ । সেয়ে মাৰ্কশ্বিট কেলেংকাৰীৰ সৈতে জড়িত কোনো লোক সাৰি যাব নোৱাৰে ৷’’
‘‘মুখ্যমন্ত্ৰী ড° হিমন্ত বিশ্ব শৰ্মাৰ দিনত এটকা এটা নিদিয়াকৈ এপিএছচিৰ চাকৰি লাভ কৰিছে ৷ তাৰোপৰি এক লাখ নিৱনুৱাই চাকৰি লাভ কৰিছে ৷ তেনেক্ষেত্ৰত এইখন চৰকাৰৰ দিনত সংঘটিত হোৱা মাৰ্কশ্বিট কেলেংকাৰীৰ দৰে গুৰুতৰ তথা দণ্ডনীয় অপৰাধৰ পৰা কোনেও সাৰি যাব নোৱাৰে ৷" তেওঁ কয় ৷
সমগ্ৰ কাণ্ডৰ সৈতে গুৱাহাটী বিশ্ববিদ্যালয়ৰ কৰ্মচাৰী জড়িত হৈ থকা সন্দৰ্ভত সুধা এক প্ৰশ্নৰ উত্তৰত মন্ত্ৰীগৰাকীয়ে কয়, "গুৱাহাটী বিশ্ববিদ্যালয়ৰ গোটেই পৰিয়ালটোক দোষী সাব্যস্ত কৰাটো উচিত নহ’ব ৷ ভালৰ ভিতৰত দুই-চাৰিজন বেয়া মানুহ থাকে । সেয়ে মাৰ্কশ্বিট কেলেংকাৰীৰ লগত জড়িত কালপ্ৰিটসকলক শাস্তি দিয়া হ’ব ।"
ইপিনে ৰাজ্যত নতুনকৈ আৰু দহ লাখ লোকক ৰেচন কাৰ্ড প্ৰদান কৰা হ’ব বুলি ঘোষণা কৰে যোগান মন্ত্ৰী ৰণজিৎ কুমাৰ দাসে ৷ যিসকলে ৰেচন কাৰ্ড লাভ কৰা নাই, সকলোকে ৰেচন কাৰ্ডৰ বাবে আবেদন কৰিবলৈ আহ্বান জনাইছে মন্ত্ৰী ৰণজিৎ কুমাৰ দাসে ।
এই প্ৰসংগত মন্ত্ৰী ৰণজিৎ কুমাৰ দাসে কয়, "ৰাজ্যৰ 42 লাখ লোকে ৰেচন কাৰ্ড পাব বুলি কোনেও কল্পনা কৰা নাছিল । কিন্তু ৰাজ্যত 35 লাখ ভুৱা হিতাধিকাৰী আছিল সেইবোৰক কৰ্তন কৰা হৈছে ৷"
