গুৱাহাটী, ২২ জুন: শনিবাৰৰ পৰা নীলাচলৰ বুকুত আৰম্ভ হ’ল মহা অম্বুবাচী মেলা ৷ কামাখ্যা মন্দিৰত আৰম্ভ হোৱা মহা অম্বুবাচী মেলাৰ আনুষ্ঠানিকভাৱে উদ্বোধন কৰে পৰ্যটন মন্ত্ৰী জয়ন্ত মল্লবৰুৱাই ।
গুৱাহাটীৰ পাণ্ডুত অনুষ্ঠিত এক অনুষ্ঠানত পৰ্যটন মন্ত্ৰী জয়ন্ত মল্লবৰুৱাই এই মেলাখনৰ আনুষ্ঠানিকভাৱে উদ্বোধন কৰি কয় যে ২০১৭ চনৰ পৰা এই মেলাখন অতি সুচাৰুৰূপে অনুষ্ঠিত কৰা হৈছে । ভক্তৰ সমাগম বৃদ্ধি পাইছে । মেলাখনৰ বিষয়ে ৰাষ্ট্ৰীয় পৰ্যায়ত বিভিন্নধৰণৰে প্ৰচাৰ কৰাৰ ফলত ভক্তৰ সমাগম বৃদ্ধি পাইছে ৷
লগতে পঢ়ক: আমাকো এধানি মৰম দিয়ক ! কামাখ্যা ধামৰ পৰা মৰম আকলুৱা মোহিনীৰ আহ্বান
মন্ত্ৰী মল্লবৰুৱাই কয় যে যোৱা দুটা বছৰত অম্বুবাচী মেলাৰ প্ৰচাৰ বিশেষ কৰা হোৱা নাই । কিয়নো ইমান বেছি ভক্তৰ সমাগম নিয়ন্ত্ৰণ কৰাটো সহজ নহয় ৷ তেওঁ কয় যে ৰাজ্য চৰকাৰে কামাখ্যা মন্দিৰৰ উন্নয়নৰ বাবে বিভিন্ন পদক্ষেপ গ্ৰহণ কৰি আহিছে ৷ এইবাৰ ৰাজ্য চৰকাৰে দিব্যলোক পৰিযোজনাৰ সহায়ত কামাখ্যা মন্দিৰলৈ অহা ভক্তসকলৰ সুবিধাৰ বাবে পদক্ষেপ গ্ৰহণ কৰিব ।
লগতে পঢ়ক: অম্বুবাচী মেলা উপভোগ কৰিবলৈ কোন পথেৰে যাব আপুনি ?
মন্ত্ৰীগৰাকীয়ে জনায় যে নীলাচল পাহাৰৰ ওপৰৰ ভাগ চৰকাৰে প্ৰাকৃতিকভাৱে ৰখাৰ ব্যৱস্থা কৰিব । কোনো নতুন আন্তঃগাথঁনি নিৰ্মাণ কৰা নহয় । কিন্তু পাহাৰৰ নামনিত ভক্তৰ সুবিধাৰ বাবে কিছু আন্তঃগাথঁনি নিৰ্মাণ কৰা হ’ব । অম্বুবাচী মেলা উদ্বোধনী অনুষ্ঠানটোত কামাখ্যা মন্দিৰ পৰিচালনা সমিতিৰ বৰদলৈ কোবিন্দ্ৰ চন্দ্ৰ শৰ্মা, সৰুদলৈ হিমাদ্ৰী শৰ্মা আৰু গুৱাহাটী পৌৰ নিগমৰ মেয়ৰ মৃগেন শৰণীয়া আদি উপস্থিত থাকে ।
উল্লেখ্য যে ২৬ জুনলৈ শক্তিপীঠ কামাখ্যা ধামত অনুষ্ঠিত হ’ব অম্বুবাচী মেলা । শনিবাৰে পুৱা অম্বুবাচীৰ প্ৰবৃত্তিৰ লগেলগে কামাখ্যা মন্দিৰৰ মুখ্য দুৱাৰ বন্ধ হৈ পৰে । ২৬ জুনৰ পুৱা দেৱীৰ নিত্য পূজাৰ পিচত ভক্তৰ বাবে পুনৰ খুলি দিয়া হ'ব মন্দিৰৰ মূল দুৱাৰ ।
অম্বুবাচী মেলাৰ বাবে কামাখ্যা ধামত সমাগম ঘটিছে বিভিন্ন ৰাজ্যৰ সাধু-সন্ন্যাসী তথা ভক্তগণৰ ।
লগতে পঢ়ক: মা কামাখ্যাৰ আশীষ ল’বলৈ ভক্তৰ ভিৰ
