গুৱাহাটী, ৪ ছেপ্টেম্বৰ: আগন্তুক কেইবাদিনলৈ উত্তৰ-পূৰ্বাঞ্চলত অব্যাহত থাকিব বৰষুণ । কেইবাখনো জিলাত হ'ব পাৰে প্ৰবল বৃষ্টিপাত । বংগোপসাগৰৰ পৰা ৯ কিলোমিটাৰ বেগত পূৱ বাংলাদেশলৈ গতি কৰা সাগৰীয় ধুমুহাৰ বাবে অসম আৰু উত্তৰ-পূৰ্বাঞ্চলত অহা কেইদিনমানলৈ বৰষুণ অব্যাহত থকাৰ কথা সদৰী কৰে গুৱাহাটীৰ বৰঝাৰত থকা আঞ্চলিক বতৰ বিজ্ঞান কেন্দ্ৰই ।
বুধবাৰে গুৱাহাটীৰ বৰঝাৰত থকা আঞ্চলিক বতৰ বিজ্ঞান কেন্দ্ৰই সদৰী কৰা তথ্য মতে, অহা ৮ ছেপ্টেম্বৰলৈ অসমকে ধৰি সমগ্ৰ উত্তৰ-পূৰ্বাঞ্চলত বৰষুণ অব্যাহত থাকিব । বতৰ বিজ্ঞান কেন্দ্ৰই সদৰী কৰা তথ্য মতে, অহা ২৪ ঘন্টাত কোকৰাঝাৰ, হাইলাকান্দি, ধেমাজি আৰু ডিব্ৰুগড় জিলাত ৩৫.১ মিলিমিটাৰৰ পৰা ৬৪.৫ মিলিমিটাৰৰ বৰষুণ হোৱাৰ সম্ভাৱনা আছে । আকৌ দক্ষিণ শালমাৰা, চিৰাং, বৰপেটা, গোৱালপাৰা, কামৰূপ, লখিমপুৰ, চৰাইদেউ, তিনিচুকীয়া, ডিমা হাছাও আৰু কাছাৰ জিলাত ৭.৫ মিলিমিটাৰৰ পৰা ৩৫ মিলিমিটাৰলৈ বৰষুণ হোৱাৰ সম্ভাৱনা আছে ।
ইপিনে বতৰ বিজ্ঞান কেন্দ্ৰই অহা ২৪ ঘন্টাৰ বাবে অৰুণাচল প্ৰদেশত অৰেঞ্জ এলাৰ্ট জাৰি কৰিছে । অহা ৮ ছেপ্টেম্বৰলৈ অসম আৰু উত্তৰ-পূৰ্বাঞ্চলৰ ৰাজ্যসমূহত ঠাইবিশেষে প্ৰৱল আৰু মধ্যমীয়া স্তৰৰ বৰষুণ হোৱাৰ সম্ভাৱনা সদৰী কৰিছে । আনহাতে বতৰ বিজ্ঞান কেন্দ্ৰই প্ৰকাশ কৰা তথ্য মতে অহা ৮ ছেপ্টেম্বৰলৈ গুৱাহাটীৰ বতৰ ডাৱৰীয়া হৈ থাকিব ।
আকৌ ৯ আৰু ১০ ছেপ্টেম্বৰত গুৱাহাটীত মধ্যমস্তৰৰ বৰষুণ হোৱাৰ সম্ভাৱনা আছে । বতৰ বিজ্ঞান কেন্দ্ৰই সদৰী কৰা তথ্য মতে, অহা ১০ ছেপ্টেম্বৰলৈ গুৱাহাটীৰ সৰ্বোচ্চ তাপমাত্ৰা ৩৫ ডিগ্ৰী আৰু সৰ্বনিম্ন তাপমাত্ৰা ২৭ ডিগ্ৰীৰ ভিতৰত থকাৰ সম্ভাৱনা আছে ।
