নলবাৰী, ৬ জুলাই: "অসমৰ বানপানীৰ ভয়াবহ পৰিস্থিতিৰ সময়ত প্ৰধানমন্ত্ৰী মৌন কিয় ? নিৰ্বাচনৰ সময়ত ডাবল ইঞ্জিনৰ শ্লোগান আৰু বানপানীৰ সময়ত ডাবল ইঞ্জিন কিয় হৈ পৰে চিঙ্গল ইঞ্জিন ?" এইদৰে চৰকাৰৰ বিৰুদ্ধে সৰৱ হ'ল আছুৰ মুখ্য় উপদেষ্টা সমুজ্জ্বল কুমাৰ ভট্টাচাৰ্য । তেওঁ অসমৰ ভয়াবহ বানপানীৰ সমস্যা ৰাষ্ট্ৰীয় সমস্যা হিচাপে গণ্য কৰিব লাগিব বুলি দাবী জনায় । শনিবাৰে নলবাৰীত জিলা ছাত্ৰ সন্থাই আয়োজন কৰা বিশেষ সম্বৰ্ধনা সভাত বিশিষ্ট অতিথি হিচাপে উপস্থিত থাকি এইদৰে কয় আছুৰ মুখ্য় উপদেষ্টাগৰাকীয়ে ।
আছুৰ মুখ্য় উপদেষ্টাগৰাকীয়ে লগতে অসমৰ শিক্ষা ব্যৱস্থাৰ সমস্যা সম্পৰ্কত মন্তব্য কৰি অতি শীঘ্ৰেই ৰাজ্য়ৰ মহাবিদ্যালয়সমূহত খালী হৈ থকা তিনিশ শিক্ষক পদ পূৰণ কৰাৰ দাবী উত্থাপন কৰে । একেদৰে বৰ্ধিত মাচুলৰ জৰিয়তে ছাত্ৰ -ছাত্ৰীৰ মুৰত এক বোজা জাপি দিয়া হৈছে বুলি প্ৰতিক্ৰিয়া ব্যক্ত কৰে সমুজ্জ্বল কুমাৰ ভট্টাচাৰ্যই । আনহাতে, ব্ৰেইন ড্ৰেইন ৰোধ নকৰাৰ লগতে অসমৰ দুখীয়া ছাত্ৰ- ছাত্ৰীৰ ভবিষ্যতৰ প্ৰতি লক্ষ্য কৰি অসমৰ মহাবিদ্যালয়সমূহত বিভাগ বৃদ্ধিৰ বাবেও দাবী উত্থাপন কৰে ।
লগতে পঢ়ক:শিৱসাগৰত আছুৰ বিশেষ অভিনন্দন অনুষ্ঠান - AASU Felicitation Programme
তেওঁ সমৰ্থ এপ চলাবলৈ অসমৰ্থ হোৱা চৰকাৰে অসমৰ ছাত্ৰ-ছাত্ৰীৰ নামভৰ্তিৰ বিষয়টোত গুৰুত্ব প্ৰদান কৰি নামভৰ্তি নিশ্চিত কৰিবলৈ দাবী উত্থাপন কৰে । ইপিনে, এ আই অৰ্থাৎ কৃত্ৰিম বুদ্ধিমত্তা সম্পৰ্কত ভাৰত চৰকাৰে প্ৰতিস্থা কৰিব বিচৰা তিনিখন শিক্ষানুষ্ঠানৰ এখন অসমত স্থাপন কৰিব লাগে বুলিও দাবী উত্থাপন কৰে সমুজ্জ্বল কুমাৰ ভট্টাচাৰ্যই ।
উল্লেখ্য যে নলবাৰী জিলা ছাত্ৰ সন্থাৰ উদ্যোগত আয়োজন আজিৰ এই বিশেষ সম্বৰ্ধনা অনুষ্ঠানত উপস্থিত থাকি অৱসৰী আৰক্ষী সঞ্চালক প্ৰধান কুলধৰ শইকীয়াই ছাত্ৰ-ছাত্ৰীক উদ্দেশ্যি ভাষণ প্ৰদান কৰে । এই অনুষ্ঠানতে সাহিত্য অকাডেমিৰ যুৱ সাহিত্য বঁটা প্ৰাপক ডাঃ নয়নজোতি শৰ্মাকো সম্বৰ্ধনা জ্ঞাপন কৰা হয় । এই অনুষ্ঠানত জিলাখনৰ তিনিশ মেধাবী ছাত্ৰ -ছাত্ৰীক সম্বৰ্ধনা জ্ঞাপন কৰা হয় ।
