গুৱাহাটী/কাছাৰ : পোহৰৰ উৎসৱ দীপাৱলীৰ আনন্দ উল্লাহৰ মাজতে ৰাজ্যৰ বিভিন্ন প্ৰান্তত নিশা সংঘটিত হয় কেইবাটাও ভয়ংকৰ পথ দুৰ্ঘটনা । গুৱাহাটী মহানগৰীতে সংঘটিত হৈছে কেইবাটাও দুৰ্ঘটনা । বৃহস্পতিবাৰে নিশা সংঘটিত শোকাৱহ দুৰ্ঘটনাক লৈ চাঞ্চল্য অব্যাহত থকাৰ মাজতে শুকুৰবাৰে নিশা পুনৰ মহানগৰীত আন এক পথ দুৰ্ঘটনা সংঘটিত হয় । য'ত এজন যুৱকে প্ৰাণ হেৰুৱায় ।
মহানগৰীৰ সাউকুছিত সংঘটিত হয় এই ভয়ংকৰ দুৰ্ঘটনাটো । নিশা এখন অটোৰিক্সা আৰু বলেৰ' পিকআপ ভানৰ সংঘৰ্ষ হয় । বলেৰ' পিকআপ ভানখনৰ চালকজন নিহত হোৱা বুলি জানিব পৰা গৈছে ।
উল্লেখ্য যে, মহানগৰীৰ দক্ষিণগাঁৱৰ পৰা সাউকুছি অভিমুখী পথত সংঘটিত হয় এই পথ দুৰ্ঘটনা । ধনতেৰছত বহু আশাৰে ক্ৰয় কৰা অটোৰিক্সাখনত নিশা ওলাই আহিছিল এটা পৰিয়াল । তেনে সময়তে হঠাৎ সন্মুখৰ পৰা অহা তীব্ৰবেগী বলেৰ' পিকআপ বাহনে মহটিয়াই থৈ যায় অটোৰিক্সাখনক ।
তাৰ পিছত কিছুদূৰ গৈ পুনৰ লাইট খুটাত খুন্দা মাৰে বলেৰ' পিকআপ বাহনখনে । দুৰ্ঘটনাটোত নিহত হয় পিকআপ বাহনৰ চালক । নিহত চালকজন বৰপেটা মন্দিয়াৰ সোনা মিঞা বুলি জানিব পৰা গৈছে । আনহাতে দুৰ্ঘটনাটোত অটোৰিক্সা খনৰ দুই আৰোহী আঘাতপ্ৰাপ্ত হয় ।
কাছাৰত পথ দুৰ্ঘটনা
ইফালে কাছাৰৰ সোনাইত আন ভয়ংকৰ পথ দুৰ্ঘটনা সংঘটিত হয় । নিশা আমজুৰঘাট গাছতলাত সংঘটিত হয় পথ দুৰ্ঘটনাটো । তীব্ৰবেগত গৈ থকা এখন বাইকে দলঙৰ ৰেলিঙত খুন্দা মাৰে । ফলত থিতাতে নিহত হয় বাইক আৰোহী । লগতে গুৰুতৰভাৱে আহত হয় বাইকখনৰ আৰোহী এজন যুৱক আৰু এগৰাকী যুৱতী । মৃত যুবকজন সোনাই কাপ্তানপুৰৰ সঞ্জিত ৰবিদাস বুলি জানিব পৰা গৈছে ।
জানিব পৰা মতে, সঞ্জিত ৰবিদাসে এসপ্তাহ পূৰ্বে সোনাই আমজুৰঘাটৰ এগৰাকী কিশোৰীক পলাই লৈ গৈছিল । পিছে আৰক্ষীয়ে কিশোৰীগৰাকীক উদ্ধাৰ কৰি অভিভাৱকক গতাই দিয়ে । যোৱা নিশা পুনৰ কিশোৰীগৰাকীক পলাই লৈ যোৱাৰ চেষ্টা কৰিছিল যুবকজনে । এজন বন্ধুৰ সৈতে নিশা বাইকেৰে কিশোৰীগৰাকীক পলাই লৈ যোৱাৰ সময়তে দুৰ্ঘটনাটো সংঘটিত হয় । দুৰ্ঘটনাটোক লৈ অঞ্চলটোত শোকাকুল পৰিৱেশে বিৰাজ কৰিছে ।
লগতে পঢ়ক :যোৰহাটৰ অগ্নিকাণ্ডত নিহত এজন; কেইবা কোটি টকাৰ সম্পত্তি ভস্মীভূত
