যোৰহাট : উত্তৰ-পূবৰ সৰ্ববৃহৎ ধৰ্মীয় অনুষ্ঠান শ্ৰীমন্ত শংকৰদেৱ সংঘৰ ৯৪ সংখ্যক বাৰ্ষিক অধিৱেশনত লাখ লাখ ভক্তৰ সমাগমেৰে উখল-মাখল হৈ থকা যোৰহাটৰ ম’হবন্ধাৰ এৰালতলি পথাৰ এতিয়া নিজম পৰিছে ।
চাৰিওপিনে বিৰাজ কৰিছে নিস্তব্ধতাই । অধিৱেশনৰ অন্তত অশ্ৰুসিক্ত নয়নেৰে এৰালতলি পথাৰৰ বৈষ্ণৱ পণ্ডিত সোণাৰাম চুতীয়া সমন্বয় ক্ষেত্ৰ এৰিলে ভক্তসকলে । কিন্তু থাকি গ'ল কিছু স্মৃতি আৰু প্ৰয়োজনীয় সা-সামগ্ৰী ।
কাৰণ লাখ লাখ ভক্তৰ সমাগম ঘটা এৰালতলি পথাৰত ভিৰৰ মাজত বহুতৰে বহু প্ৰয়োজনীয় সামগ্ৰী হেৰাই গৈছিল । উক্ত প্ৰয়োজনীয় সামগ্ৰীসমূহ পোৱা ভক্তপ্ৰাণ ৰাইজে এৰালতলি পথাৰত থকা বিভিন্ন অনুসন্ধান কক্ষত সেইবোৰ জমা দিছিল । এতিয়া সেইবোৰ অনুসন্ধান কক্ষতে জমা হৈ আছে । যাৰ বাবে বিপাঙত পৰিছে অনুসন্ধান সমিতি ।
অনুসন্ধান কক্ষত জমা থকা ভকত বৈষ্ণৱৰ সামগ্ৰীসমূহ লৈ যাবলৈ অনুসন্ধান কক্ষৰ তৰফৰ পৰা অনুৰোধ জনোৱা হৈছিল । কিন্তু বৃহৎ এলেকা আৱৰি থকা অধিৱেশনস্থলীৰ অনুসন্ধান কক্ষৰ পৰা উক্ত সামগ্ৰীবোৰ নিবলৈ সক্ষম হোৱা নাছিল ভকত বৈষ্ণৱে ।
ফলত বৰ্তমান উক্ত সামগ্ৰীসমূহ অনুসন্ধান আৰু যোগাযোগ উপ-সমিতিৰ ওচৰত আছে । যদি আপোনাৰো কিবা সামগ্ৰী আছে তেন্তে সংশ্লিষ্ট সমিতিৰ সৈতে যোগাযোগ কৰি সংগ্ৰহ কৰিব পাৰে ।
৯৪ সংখ্যক শ্ৰীমন্ত শংকৰদেৱ সংঘৰ বাৰ্ষিক অধিৱেশনত 'অনুসন্ধান কক্ষ'ত জমা হৈ থকা সামগ্ৰীসমূহ হৈছে:
(১) গামোচা ৬২ খন
(২) মহিলাৰ মানিপাৰ্চ ২৭টা
(৩) সৰু পাৰ্চ ১৩টা
(৪) চশমা ৮ যোৰ
(৫) ৰূপৰ চেইন এডাল
(৬) টৰ্চ এটা
(৭) ৰুমাল দুখন
(৮) PAN card এখন
(৯) আধাৰ কাৰ্ড দুখন
(১০) ATM card ৩ খন
(১১) বঁটাৰ ওপৰত পাৰি দিয়া কাপোৰ এখন
(১২) Body oil এটা
(১৩) বাইক আৰু ঘৰৰ চাবি ১০ কোছা
(১৪) মহিলাৰ ঘড়ী ৪টা
(১৫) হেলমেট এটা
(১৬) এডিডাছ বেগ এটা
(১৭) জেকেট দুটা
(১৮) স্কাৰ্ফ ১৩ খন
(১৯) মাফলাৰ ৬খন
(২০) টুপী ৪টা
(২১) চুৱেটাৰ ৪টা
(২২) চেলেং ৭খন
(২৩) ৰিহা এখন
(২৪) মেখেলা এখন
(২৫) সৰু জেকেট এটা
(২৬) সৰু বেগ এটা
(২৭) মাকো এটা
উল্লেখ্য যে ৬ ফেব্ৰুৱাৰীৰ পৰা ৯ ফেব্ৰুৱাৰীলৈ চাৰিদিনীয়া কাৰ্যসূচীৰে যোৰহাটৰ ম'হবন্ধা এৰালতলি পথাৰৰ বৈষ্ণৱ পণ্ডিত সোণাৰাম চুতীয়া সমন্বয় ক্ষেত্ৰত অনুষ্ঠিত হৈছিল শ্ৰীমন্ত শংকৰদেৱ সংঘৰ ৯৪ সংখ্যক বাৰ্ষিক অধিৱেশন ।
