যোৰহাট, 29 ফেব্ৰুৱাৰী : নাগৰিকত্ব সংশোধনী আইন চমুকৈ 'কা' শীঘ্ৰে সমগ্ৰ দেশজুৰি বলৱৎ কৰা হ'ব বুলি কেন্দ্ৰীয় চৰকাৰে ঘোষণা কৰাৰ লগে লগে যুদ্ধংদেহী ৰূপত সাজু হৈছে অসম চৰকাৰ । সেয়ে আৰক্ষীৰ ছুটীও সাময়িকভাৱে বাতিল কৰা হৈছে ৷ লগতে থানাসমূহত প্ৰতিবাদ প্ৰতিৰোধ কৰিব পৰাকৈ সামগ্ৰী মজুত ৰাখিবলৈ নিৰ্দেশ দিয়া হৈছে ৷
অসম চৰকাৰৰ এই নিৰ্দেশৰ পাচতে এতিয়া সৃষ্টি হৈছে তীব্ৰ প্ৰতিক্ৰিয়াৰ ৷ অসম চৰকাৰে অসমবাসী ৰাইজৰ ক্ষোভ আৰু অভিমানৰ বহিঃপ্ৰকাশ দেখিছে ৷ যাৰ বাবে আৰক্ষী প্ৰশাসক সষ্টম হ’বলৈ নিৰ্দেশ দিছে বুলি সংবাদ মাধ্যমৰ আগত মন্তব্য কৰে যোৰহাট জিলা সমিতিৰ আছুৰ সাধাৰণ সম্পাদক অৰ্জুন মণি ভূঞাই ।
লগতে তেওঁ কয়, ‘‘কা-ৰ জৰিয়তে অসমীয়া জাতিৰ সত্তাটোক চিৰদিনৰ বাবে পংগু কৰি দিব বিচৰা হৈছে ৷ কা বিৰুদ্ধে অসমবাসী ৰাইজৰ সহযোগত ছাত্ৰ সন্থাই আন্দোলন কৰি আহিছে আৰু কৰি থাকিব । ইতিমধ্যে কা ওপৰত সৰ্বোচ্চ ন্যায়ালয়ত গোচৰ চলি থকা পিচতো কেন্দ্ৰীয় চৰকাৰে এই সিদ্ধান্ত কিয় গ্ৰহণ কৰিছে, সেয়া সহজে অনুমেয়’’ ৷
লগতে পঢ়ক : লোকসভা নিৰ্বাচনৰ পূৰ্বে দেশত কাৰ্যকৰী হ’ব নাগৰিক (সংশোধনী) আইন !
ষষ্ঠ অনুসূচী আৰু ইনাৰ লাইন পাৰ্মিট থকা ৰাজ্যৰ বাবে যদি কা বেয়া হয়, তেতিয়া হ’লে অসমৰ কাৰণে ই কিয় ভাল বুলিও প্ৰশ্ন কৰে যোৰহাট আছু সাধাৰণ সম্পাদক অৰ্জুন মণি ভূঞাই ।
- " class="align-text-top noRightClick twitterSection" data="">
আনহাতে, যুৱ অধিবক্তা ধ্ৰুৱ বৰুৱাই কয়, ‘‘কা যদি বলবৎ হয়, তেতিয়া হ’লে নিশ্চিতভাৱে অসমত আন্দোলনৰ এক পৰিৱেশ সৃষ্টি হ’ব । অসমীয়া ভাষা, কলা-সংস্কৃতিৰ প্ৰতি ভাবুকি থকা কা-খন অসমৰ ৰাইজৰ কথা চিন্তা কৰি অসমত প্ৰয়োজ্য কৰাৰ পৰা বিৰতি থকাটো উচিত । কা বলবৎ কৰা হ’ব বুলি কৰা ঘোষণা অতি দুৰ্ভাগ্যজনক ৷ কাৰণ কা বৰ্তমান উচ্চতম ন্যায়ালয়ৰ বিচৰাধীন হৈ আছে’’ ।
লগতে পঢ়ক : কা বলবৎ কৰিলে প্ৰতিবাদত নামিব আছু : শংকৰজ্যোতি বৰুৱা
